ABŞ-ın Kaliforniya ştatında məşhur rusiyalı telejurnalist Vladimir Pozneri susduran azərbaycanlı tələbə Arzu Məmmədovanın çıxışı mediada, sosial şəbəkələrdə səs-küyə səbəb olub. Pozneri təftiş edən məlum çıxışında Arzu özünün də Dağlıq Qarabağdan olduğunu söyləyib, ermənilərlə azərbaycanlıların vaxtilə bir yerdə yaşadığını diqqətə çatdırıb. O, Bakının mərkəzində hələ də erməni kilsəsinin olduğunu qeyd edərək, Poznerə bu sualı ünvanlayıb:

"Siz Ermənistanı dəstəkləməklə qadın və uşaq qatillərini alqışlayırsınız və bununla da minlərlə azərbaycanlıya, məcburi köçkünlərə, o cümlədən mənə və ailəmə qarşı ayrı-seçkilik edirsiniz. Söz azadlığı ilə nifrət hissi arasındakı xətt haradan keçir?".

Vladimir Pozner A. Məmmədovanın sualları qarşısında aciz qalaraq "Dağlıq Qarabağ Ermənistanın rəsmi olaraq tanıdığı ərazidir", replikasını verib. A. Məmmədova onun sözünü kəsərək, Dağlıq Qarabağın rəsmi şəkildə Azərbaycan Respublikasının tərkibində olan ərazi olduğunu vurğulayıb.

Gənc qızın bu addımı sosial şəbəkələrdə və mətbuatda müzakirə olunub, azərbaycanlı jurnalistlərin xarici ölkələrdə aktivliyi məsələsini gündəmə gətirib.

Tələbənin Azərbaycan həqiqətlərini dünyaya çatdırmağa çalışması qarşısında “Jurnalistlər hansı işi görürlər” sualı səsləndirilib. Belə görünür ki, əksəriyyət xüsusilə xaricdə yaşayan jurnalistlərin Qarabağ məsələsində, Azərbaycan həqiqətlərinin dünyaya çatdırılması işində fəaliyyətindən narazıdır.

Bu barədə Modern.az-a danışan telejurnalist, professor Qulu Məhərrəmli söyləyib ki, Arzu Məmmədovanın həmin görüşdə addımı situasiya ilə bağlı məsələdir. Jurnalist düşünür ki, azərbaycanlı tələbə həmin situasiyada çox layiqli və ləyaqətli davranıb:

“Onun auditoriyadakılara gerçəkliyi çatdıra bilməsi çox müsbət addımdır. Bu, o deməkdir ki, bizim həqiqətən hazırlıqlı gənclərimiz var, onlar yeri gələndə öz mövqelərini bildirə bilirlər.

Amma bu hadisəni bir jurnalistlə müzakirə etmək yanlışdır. Bundan istifadə edib, xaricdə o cümlədən Azərbaycanda fəaliyyət göstərən jurnalistləri aşağılamaq, irad tutmaq, belə müqayisə aparmaq doğru deyil. Belə situasiyalarda hazırlıqlı olmaq zərurəti bütün vətəndaşlara aiddir. Jurnalistin isə hazırlığı daha yüksək səviyyədə olmalıdır. Belə nümunəvi jurnalistlərimiz var ki, çəkinmədən rəsmilərə suallar ünvanlaya bilirlər. Halbuki, nəyə görədirsə, onlar çox görünmürlər. Ya onların təmsil etdikləri mətbuat qurumlarının azadlığı məhduddur, yaxud da müxbirlərin özləri üçün müəyyən çərçivələr müəyyənləşdirirlər. Belə olanda onların xaricdəki fəaliyyəti də görünmür. Amma istənilən halda, fəaliyyətdə aktiv olan jurnalistlərin peşəkarlığını şübhə altına almaq doğru deyil”.

“Azadinform” İnformasiya Agentliyinin baş redaktoru Niyaz Niftiyev düşünür ki, Arzu Məmmədova ilə qürur duymaq, onun fədakarlığını həm sosial platformalarda, həm internet resurslarda, həm bütün növ informasiya alətlərində manşetə daşımaq lazımdır:

“Mən bu barədə status da yazdım. Hətta vurğuladım ki, qoy gənclərimiz ürəkli olsun, bu kimi tədbirlərdə Azərbaycanın haqlı mövqeyini qorumaqda tərəddüd etməsinlər.
“Jurnalistlərimiz onlardan nümunə götürməlidirlər” kimi yanaşmaları isə ədalətli hesab etmirəm. Bildiyiniz kimi, Azərbaycan jurnalistləri zaman-zaman bu kimi auditoriyalarda kifayət qədər aktiv olub, hətta bəziləri verdikləri suallara görə işlərindən belə olublar. Bu nöqteyi-nəzərdən Azərbaycan juranlistlərinin belə məsələlərdə passiv olduqlarını iddia etmək doğru yanaşma deyil. Əksinə, hesab edirəm ki, Arzu Məmmədova da məhz o jurnalistlərimizin cəsarətindən nümunə götürüb. Düşünürəm ki, ölkədən kənarda yaşayan hər bir Azərbaycan gənci peşəsindən və fəaliyyətinən aslı olmayaraq məlum auditoriyalarda həm də jurnalist olmalıdır. Necə ki, Arzu Məmmədova olduğu məkanda həm də bir jurnalist kimi Azərbaycanın maraqlarını müdafiə edən sual verdi. Məlum olduğu kimi, Azərbaycan jurnalistlərinin bütün beynəlxalq auditoriyalarda iştirakı müxtəlif səbəblərdən mümkünsüzdür. Belə məqamlarda Arzu Məmmədova kimi gənclərimizin onları əvəz etməsi gözəl nümunədir”.

Müstəqil jurnalist Azər Rəşidoğlu deyir ki, Azərbaycanda kifayət qədər istedadlı jurnalist və ictimai fəal var. Ermənilərlə ideoloji savaşda bizim potensialımız daha güclüdür:

“Sadəcə, biz özümüz özümüzün düşməniyik. Ermənilər milli məsələdə birləşə bilir, biz isə birləşə bilmirik. Yüzlərlə insan var ki, savadı ilə düşməni susdura bilər. Onlara yardım etmək əvəzinə mane oluruq”.

A.Rəşidğlunun fikrincə, bu mövqeyi dəyişməyimizə ehtiyac yoxdur:

“Dəyişmək lazım deyil. Müsbət addım atanı nümunə götürməliyik, lakin onu ilahiləşdirməməliyik. Bu gənc qıza da bu qədər qısqanc yanaşmağa dəyməz. Cəsarətli və ağıllı qızdır. Ona kömək etməliyik”.


Paylaş: