Salyan şəhər Xəlil Rza 54 ünvanında yaşayan bir qrup sakin iş adamı Cavanşir Ağalarov tərəfindən aldadıldıqlarını deyirlər. Onlar bildirirlər ki, iş adamından kreditlə 44 min manata aldıqları evə görə onlarda əlavə olaraq 26 min manat məbləğində pul tələb olunur.

Redaksiyamıza müraciət edən şikayətçilərdən biri Həyat Muradova olanları belə nəql edir:

“Biz 7-8 ailəyik ki, Cavanşir Ağalarov adlı iş adamından kreditlə həyət evləri almışıq. İş adamı isə bizim başımıza oyun açır. O, tikinti işiylə məşğuldu və ev tikərək insanlara satır. Hamı kimi biz də iki mərtəbəli ev almışıq. Biz evi müqaviləylə almışıq və ödənişimizi başa vurduqdan sonra C.Ağalarov tərəfindən “sürpirzlə” qarşılaşdıq. O, yenidən bizlərə qəbz göndərib bildirdi ki, 26 min manat əlavə ödəməlisiniz. Bununla bağlı prokurorluğa, Salyan rayon Polis Bölməsinə müraciət etdik. Lakin heç bir köməklik edilmədi. C.Ağalarov “Acces Bank”dan 600 min manat kredit götürərək özünə ticarət mərkəzi və bir də bizim yaşadığımız evləri tikib. Yenə heç olmasa mənim aldığım evə qapı qoyulmuşdu, digər sakinlərə isə evlər təmirsiz verilib, hamısını özümüz təmir etmişik. İndi də bizi məhkəməyə verərək pulun ödənilməsiylə bağlı qətnamə qəbul etdirir”.

“İcra Hakimiyyətinin başçısı dedi ki...”

“Biz problemimizlə bağlı dörd dəfə Salyan rayon İcra Hakimiyyətinin başçısı Sevindik Hətəmovun qəbulunda olduq və başçı bizə dedi ki, “nə qədər ki, mən Salyanda başçı işləyirəm, sizi bu evlərdən heç kim çıxarda bilməz”. Bəs sabah icra başçısı dəyişsə, biz neyləyəcəyik? C.Ağalarov evlərin bizə məxsus olmasıyla bağlı heç bir sənəd vermir”.

Zərərçəkənlərdən biri də Mirabdulla Ağalarovdur və o, da C.Ağalarovun əlavə 26 min manat tələbini əsassız sayır:

“C.Ağalarov bizə deyir ki, evi kreditə götürdüyünüz vaxtdan indiyə kimi olan müddətə götə 42 faiz kredit məbləği üstünə gəlirəm. Mənim aldığım evdə müqavilədə yazıb ki, evlər satılandan sonra mən sizlərə çıxarış verəcəm. Amma mənə ödənişi tam ödəməyimlə bağlı heç bir sənəd verməyib. 2016-cı ilin iyun ayında son ödənişimi edəndə C.Ağalarova dedim ki, mənim evimə sənəd verin. Dedi ki, “sənin ödənişin bitməyib, bilmirsən evin kreditdi?”. İndi mən təqaüd alan adamam, əlavə 26 min manatı necə verməliyəm. Hamıdan qabaq kredit borcumu bağlamışam. İndi də C.Ağalarov həmin məsələyə görə sakinləri bir-bir məhkəməyə verir. Hakim Muradağa Qasımovla dostdular, bir yerdə yeyib-içirlər. Qəbzlərim əlimdə olduğu üçün mənə o qədər təzyiq göstərə bilmir”.

Şikayətçilərdən biri Mədinə Bəşirova deyir ki, iş adamı tərəfindən anası Səadət Əliyeva məhkəməyə verilib. Sakinlər deyirlər ki, onlar beş ildən çoxdur ki, burda yaşayırlar, qaz, işıq, su xətlərinin hamısını özləri çəkiblər. Ev alan sakinlərdən Bəhram Əsədova isə Salyan rayon Məhkəməsi tərəfindən 25 min manat pulun ödənilməsiylə bağlı qərar çıxarılıb.

Araşdırmamız davam edir... //moderator.az//





Paylaş: