“İcbari tibbi sıortaya keçid müsbət hadisədir və bizdə də bu sistemə keçid lazımdır. Dünyanın bütün ölkələrində icbari tibbi sığorta işləyir və bizdə də işləməlidir. Mən bu addımın atılmasını müsbət qiymətləndirirəm”.

regionxeberlericom.az bildirir ki, bu fikirləri Reyting.az-a açıqlamasında Ali Sovetin sabiq sədri, Tibb Universitetinin keçmiş rektoru Yaqub Məmmədov Azərbaycanın 2020-ci ildə icbari tibbi sığorta sisteminə keçidi haqda danışarkən deyib.

Professor hesab edir ki, Azərbaycanın icbari tibbi sığorta sisteminə keçidi yaxşı nəticələr verməlidir: “Dünyada tibb siyasətinin əsasını icbari tibbi sığorta təşkil edir. Bizdə də belə olmalıdır. Hesab edirəm ki, buna müsbət yanaşılmalıdır”.

İcbari tibbi sığortaya keçidin həkim və tibb personalının rifahına hansı formada təsir edəcəyinə gəldikdə Y. Məmmədov bildirib ki bu, daha çox xidmətin təşkili və hansı səviyyədə yerinə yetirilməsindən asılı olacaq: “Hər bir iş onun necə təşkili və icra edilməsindən asılıdır. Tibbi sığorta da bu cürdür. Əgər tibbi sığortanı dünyanın qabaqcıl ölkələrində tətbiq edilmiş formada həyata keçirə bilsələr, müsbət nəticə verəcək. Bundan da həkimlər və xalqımız razı qalacaq. Yox, əgər burada da müəyyən əyrintilərə yol veriləsə, düzgün yerinə yetirilməsə problemlər yaranacaq”.


Paylaş: