Məhkəmə sabiq vəkilin Vəkillər Kollegiyasından uzaqlaşdırılması barədə qərarı qüvvədə saxlayıb.

Musavat.com xəbər verir ki, Bakı Apellyasiya Məhkəməsində sabiq vəkil Vüqar Poladovun Vəkillər Kollegiyasından xaric edilməsi ilə bağlı qərara apellyasiya şikayətinə baxılıb.

Hakim Səriyyə Seyidovanın sədrliyi ilə keçirilən iclasda qərar elan edilib. Qərara əsasən, Vüqar Poladovun şikayəti təmin edilməyib.

Qeyd edək ki, Vəkillər Kollegiyasının Rəyasət Heyəti V.Poladovun vəkillikdən xaric olunması ilə bağlı qərar qəbul edib və bununla bağlı məhkəməyə müraciət edib.

2 saylı Bakı İnzibati-İqtisadi Məhkəməsi VK-nın müraciətini təmin edib. Qərardan narazı qalan V.Poladov apellyasiya şikayəti verib.

Xatırladaq ki, V.Poladov ötən ay dələduzluqda və rüşvət verməyə təhrik etmədə təqsirli bilinərək, Bakı Ağır Cinayətlər Məhkəməsinin hökmü ilə 8600 manat cərimə edilib və onun vəkillik fəaliyyəti ilə məşğul olması 2 illik qadağan edilib. Bu iş üzrə digər təqsirləndirilən - sabiq müstəntiq Misir Əmirov isə 5000 manat cərimə edilib.

Vüqar Poladov Ədliyyə Nazirliyinin İcra Baş İdarəsinin keçmiş baş icra məmuru olub. O, uzun müddət İctimai Televiziyada "İcra məmuru" rubrikasının daimi müsahibi olub və ölkədə məhkəmə qərarlarının icrası ilə bağlı hesabatlar verib. Sonradan həmin sistemdən uzaqlaşıb və vəkil kimi fəaliyyətə başlayıb.

V.Poladov dövlət xadimi, uzun illər Azərbaycan SSR kənd təsərrüfatı naziri olmuş Möhsün Poladovun nəvəsidir.


Paylaş: