Ağstafanın keçmiş icra başçısı Nizaməddin Quliyev, müavini Ramiz Tatarov, həmçinin Yevlaxın keçmiş icra başçısı Qoca Səmədovun həbsindən sonra ötən gün daha bir icra başçısı iş başında saxlanılıb. Bu dəfə Dövlət Təhlükəsizliyi Xidmətinin keçirdiyi xüsusi əməliyyat zamanı Neftçala İcra Hakimiyyətinin başçısı İsmayıl Vəliyev rüşvət alarkən tutulub.

Məlumat üçün bildirək ki, İsmayıl Vəliyev 2011-ci ildən Neftçalaya icra başçısı təyin olunmuşdu. O, Azərbaycan Respublikasının ilk baş prokuroru İsmət Qayıbovun bacısı oğludur.

Bəzi KİV-lərdə gedən xəbərlərə görə, bir neçə rayonun icra hakimiyyətlərində yoxlamalar aparıldığı və bəzi yoxlamaların həbslərlə nəticələnəcəyi iddia olunur. Məlumdur ki, icra hakimiyyətləri cəmiyyətdə ən çox şikayət olunan qurumlar kimi tanınır. İllərdir mətbuatda icra başçıları “kiçik padşahlar” kimi təqdim olunur. Lakin son zamanlar Azərbaycan rəhbərliyi tərəfindən həyata keçirilən uğurlu islahatların, kadr və struktur dəyişikliklərinin mühüm tərkib hissəsi kimi rüşvətə bulaşmış bir sıra dövlət məmurlarının, icra başçılarının da təmizlənməsi prosesi həyata keçirilir. Prosesə Ağstafadan start verildi və Azərbaycanda ilk dəfə olaraq icra başçısı iş başında həbs olundu. Hətta əməliyyatın görüntüləri də ictimailəşdirildi. Məlumdur ki, Prezident son aylar ərzində həyata keçirdiyi yeni icra hakimiyyəti təyinatlarında rüşvət və korrupsiya faktlarına xüsusi olaraq toxunmuş, bu cür qanunsuz əməllərlə məşğul olan məmurların sərt şəkildə cəzalandırılacağını bildirmişdi. Dövlət başçısı Yevlaxın və Xaçmazın yeni icra başçılarını qəbul edərkən demişdi: “Bütün xoşagəlməz hallara son qoyulmalıdır, rüşvətxorluq, korrupsiya tamamilə yığışdırılmalıdır. Mən sizə şəxsən bu göstərişi verirəm. Əgər eşitsəm, bilsəm ki, əyri yola gedirsiniz, onda siz çox ciddi cəzalandırılacaqsınız. Bunu bəri başdan bilin və bütün başqa yerli icra orqanlarının nümayəndələri, rəhbərləri məni yaxşı eşitsinlər”.

İcra başçılarının rüşvətə görə həbs olunmasını “Şərq”ə dəyərləndirən sosioloq-alim, professor Əhməd Qəşəmoğlu deyib ki, qanunsuz əməllər törədən icra başçılarının bu şəkildə ifşa olunması və həbs edilməsi digər məmurlar üçün dərs ola bilər. Professorun sözlərinə görə, qətiyyətlə bu məsələnin üzərinə gedilməsi rüşvətə bulaşmış icra başçılarının təmizlənməsi ilə nəticələnər:

“Həbs qorxusundan çox adam dərs çıxaracaq və başqa icra başçıları bu cür qanunsuz əməl törətməkdən çəkinəcəklər. İcra başçılarının böyük əksəriyyəti rüşvətə meyillidir. Əksər icra hakimiyyətləri başçılarının aldıqları rəsmi məvaciblə müqayisədə qat-qat artıq var-dövlətə, mal-mülkə sahib olmaları, xaricdə biznes qurmaları onların rüşvət aldıqlarını göstərir. Deməli, icra başçıları təkcə əməkhaqqı ilə keçinməyiblər. Ona görə də Azərbaycan ictimaiyyətində icra başçıları ilə bağlı haqlı olaraq ümumi ictimai fikir formalaşıb ki, onların hamısı rüşvət alır”.

Ə.Qəşəmoğlunun fikrincə, əvvəllər o qədər sərt tələb olmadığı üçün icra başçıları istədikləri kimi hərəkət ediblər və “sərbəst” olublar:

“O səbəbdən köhnə icra başçılarında rüşvətxorluq müəyyən qədər vərdiş halını alıb. Psixoloji olaraq rüşvətə meyilləniblər. Çox güman ki, yeni təyin olunan gənc icra başçıları bu yola getməyəcəklər. Gənclər sərt xəbərdarlıqdan və tövsiyələrdən daha yaxşı ibrət götürəcək. Amma köhnə kadrlar yenə də məqam gözləcəklər və fürsət düşdükcə neqativ əməllərə əl atacaqlar”.


Paylaş: