Sabiq MTN naziri Eldar Mahmudovun dostu, biznes ortağı olan Çingiz Əsədullayevin adı daha bir cinayət işində keçir. Məlum olub ki, Çingiz Əsədullayev rəhbəri olduğu "Azəriqazbank"da (AGbank) öz dostuna saxta qızıllar girov qoyaraq külli miqdarda kredit götürmək üçün şərait yaradıb. Bank rəhbərliyi dəyişəndən sonra Əsədullayev və dostunun işinin üstü açılıb.
RegionXəbərləri.com xəbər verir ki, Musavat.com-un yazdığına görə, söhbət hazırda həbsdə olan və Cinayət Məcəlləsinin 178.3.2-ci (külli miqdarda dələduzluq etmə) maddəsi ilə ittiham edilən Səmimi Eldar Yunis oğlunun cinayət işindən gedir.
Eldar Səmimi barəsində olan cinayət işi üzrə məhkəmə araşdırması Bakı Ağır Cinayətlər Məhkəməsində davam etdirilir.
Cinayət işinin materiallarında dələduzluq hadisənin bir çox ilginc məqamları üzə çıxıb.
Əvvəlcə qısa olaraq qeyd edək ki, Eldar Səmimi "Azəriqanbank"dan kredit götürmək üçün banka qızıl-zinət əşyalarını girov qoyub. Bankdan külli miqdarda kredit götürən Eldar Səmimi lombard açaraq biznes fəaliyyətini davam etdirib. Lakin işləri yaxşı getmədiyi üçün krediti ödəyə bilməyib. Bu azmış kimi bankın rəhbərliyi dəyişən zaman araşdırma aparılıb və Eldar Səmiminin banka qoyduğu qızılların bir çoxunun saxta olduğu üzə çıxıb.
Eldar Səmimi kimdir?
63 yaşlı Eldar Səmimi 1985-ci ildə Azərbaycan İqtisad Universitetinin maliyyə-kredit fakültəsini bitirib.
1993-cü ildə "Azəriqazbank" təsis edildikdən sonra 2 ilə yaxın bankın müşahidə şurasının sədri olub. Həmçinin bankın həmtəsisçilərindən biri olub. Daha sonra "Azərbaycan Beynəlxalq Bankı"nda və "Mostbank"da da çalışıb. 1999-cu ildə Moskvaya gedərək orada banklardan birinin idarə heyətinin sədr müavini kimi çalışıb. 2010-cu ildə isə Azərbaycana qayıdıb və bir müddət Dövlət Sosial Müdafiə Fondunda çalışıb.
Eldar Səmimi 2012-ci ildə "Təzə bazar" yaxınlığında icarəyə yer götürərək lombard işlətməyə başlayıb. Lombard üçün Eldar Səmimi "AGbank"dan bir neçə dəfə kredit götürüb.
Yarım milyon manata yaxın kredit götürən Eldar Səmimi borcunu ödəyə bilməyib. Faizlərlə birlikdə onun borcu 700 min manatı ötüb.
Eldar Səmimi borcunu ödəyə bilmədiyi üçün bank tərəfindən məhkəməyə verilib. Məhkəmə qərar verib ki, Eldar Səmiminin banka girov qoyduğu qızıl-zinət əşyaları müsadirə edilərək onun borcuna yönləndirilsin.
Elə Eldar Səmiminin cinayət işinin üstü də bu zaman açılıb. Bank tərəfindən qızıl zinət əşyalarının qiymətləndirilməsi aparılan zaman məlum olub ki, banka qoyulan əşyaların bəziləri qızıl deyilmiş.
Müəyyən edilib ki, Eldar Səmiminin banka girov olaraq qoyduğu 2 ədəd xəritə tablosu, xəncər, qılınc və portret qızıldan deyilmiş.
"Qiymətləndirmə Xidmət Mərkəzi" MMC-nin əməkdaşları tərəfindən müəyyən edilib ki, yuxarıda adı çəkilən əşyaların sadəcə üz hissəsi qızıl olub. Lakin banka təqdim edilən zaman xalis çəki qızıl olaraq göstərilib və bununla da ayrılan kredit şişirdilib.
Qeyd edək ki, Eldar Səmimi Çingiz Əsədullayevlə dostluq münasibətində olub. Çingiz Əsədullayev uzun müddət "AGbank"ın İdarə Heytinin sədri olub. Eldar Səmimi krediti də Əsədullayevin köməyi ilə alıb.
Bank əməkdaşları Eldar Səmiminin təqdim etdiyi qızıl-zinət əşyalarını aşağı qiymətləndirən zaman o, bankın rəhbərliyinə müraciət edib və məsələni öz xeyrinə həll etdirə bilib. Hətta elə zaman olub ki, onun bankda girov kimi təqdim etdiyi əşyalar qiymətləndirilməyib. Bu göstərişi də Çingiz Əsədullayev verib.
Növbəti yazıda bu cinayət işində adı keçən şəxslərlə bağlı geniş məlumat verəcəyik. Cinayət işi üzrə şahid qismində bankın bir neçə əməkdaşı dindirilib. Onlar da təsdiq ediblər ki, Eldar Səmimi Çingiz Əsədullayevin dostu olub və kredit də onun göstərişi ilə verilib.
Eldar Səmimi isə bu işdə özünü təqsirli bilmir. Deyir ki, adı çəkilən əşyaların saxta olduğunu bilməyib. Onun sözlərinə görə həmin əşyaları tanımadığı qızıl alverçisindən alıb.
Xatırladaq ki, Çingiz Əsədullayev sabiq MTN naziri Mahmudovun ən yaxın adamı idi. Əsədullayevin rəhbəri olduğu bankda Mahmudova məxsus pulları saxladığı, həmin bank vasitəsi ilə xarici ölkələrdəki hesablara köçürdüyü bildirilir.
Malik Əliyev və Rüfət Vəliyev ölkədən 5 milyard 500 milyon manat nağd pul çıxarmaqda suçlanaraq həbs edilmişdilər. Araşdırmalarımız zamanı məlum olmuşdu ki, həmin pullar Eldar Mahmudova məxsus olub. Milyardların bir hissəsi Çingiz Əsədullayevin rəhbəri olduğu "AGbank" vasitəsi ilə ölkədən çıxarılıb.
Onu da qeyd edək ki, Çingiz Əsədullayev 90 saylı Ağdaş seçki dairəsindən deputat seçilmişdi. Eldar Mahmudov postunu itirəndən bir neçə gün sonra onun dairəsinin nəticələri ləğv edilmişdi.


Paylaş: