Yeniavaz.com-a Sumqayıt şəhər H. Zeynalabdin qəsəbəsində məskunlaşmış Şıxəliyevlər ailəsi tərəfindən müraciət daxil olub. Müraciətdə ailə böyüyü Ramiz Şıxəliyev dolanışıqlarının çətin olduğunu və yardıma ehtiyacları olduğunu qeyd edir.
Ailə təxminən 17 il əvvəl Şamaxıdan qəsəbəyə köçüb. Elə o vaxtdan qəsəbənin Dədə Qorqud küçəsində həyətində yarıtikili olan həyətyanı sahə alıb orada məskunlaşıblar. Yaşadıqları yer isə ev əvəzinə həyətdəki vaqon olur. Amma vaqonun vəziyyəti yaşamağa yararlı olmadığı üçün 4 il əvvəl qəsəbə sakinləri tərəfindən "İnayə" xeyriyyə ictimai birliyindən ailəyə kömək edilməsi istənilir. Bu müraciətdən sonra onlar üçün yeni yaşayış vaqonu təşkil edilir. Ailə özü həmin vaqonun ətrafına dəmir şiferlərlə çəpər çəkir. Və burada yaşanmağa başlanılır.
Havalar soyuq keçdiyi üçün indi Ramiz bəyin oğlu və ailəsi uşaqları soyuqdan və xəstəlikdən qorumaq məqsədilə qohumlarının evində yaşayırlar.
7 nəfərdən ibarət olan ailə qazandıqları az maaşla keçimlərini təmin etməyə çalışırlar.
Ramiz Şıxəliyev fəhlədir. Ölkədə elan olunmuş fövqaladə vəziyyətlə əlaqəli olaraq hazırda işləmir.
Ramiz bəyin xanımı 290 AZN müqabilində işləyir. Karantin rejimi ilə əlaqədar olaraq hazırda evində deyil, işlədiyi quşçuluq fermasında qalır.
Şikayətçinin iki oğlundan biri az maaşla işləsə də ailənin təminatını tam ödəmək olmur. Digər oğlu isə tələbədir.



Paylaş: