Koronavirusla mübarizədə effektli dərman tapılıb.

Böyük Britaniyada koronavirusun müalicəsi üçün tapılan dərman preparatının sınağından sonra Ümumdünya Səhiyyə Təşkilat da bəyanatı yayıb. Təşkilatın baş direktoru Tedros Adhan Qebreyesus bunu "elmi yüksəliş" adlandıraraq məmnunluğunu ifadə edib. Təşkilatın yaydığı bəyanatda Oksford Universitetində aparılan sınağın “Dekzametazon” preparatının koronaviruslu xəstələrin ölüm riskini azaltdığı vurğlanır.

Kifayət qədər ucuz (11 manat) olan bu dərmanının COVID-19-u ağır formada keçirən xəstələrin müalicəsində aşağı dozada istifadə olunduğu bildirilir. Məlumata görə, dərman ağciyərlərin süni ventilyasiyası cihazına qoşulu olan xəstələrin ölüm ehtimalını 1/3 nisbətdə azaldıb. Bu dərman 2000 xəstə üzərində təcrübədən keçirilib.

Nəticələr təcrübədən keçməyən xəstələrin vəziyyəti ilə müqayisə edilib. Məlum olub ki, ağciyərlərin süni ventilyasiyası cihazına bağlı xəstələrin ölüm riski 40%-dən 28%-ə enib. Oksigenə ehtiyacı olan xəstələrdə isə bu göstərici 25%-dən 20%-ə enib.

Maraqlıdır, qeyd olunan dərmanın Azərbaycana gətirilməsi və koronavirus xəstələrinin müalicəsində istifadəsi mümkündürmü?

Tibbi Ərazi Bölmələrini İdarəetmə Birliyinin (TƏBİB) mətbuat katibi Rəvanə Əliyeva Cebhe.info-ya açıqlamasında koronavirusun dərmanının və vaksinin hələ olmadığını deyib:

“Koronavirus xəstələri simptomatik müalicə olunur və müalicə də dövlət hesabına aparılır”.

TƏBİB rəsmisi Böyük Britaniyada koronavirusun müalicəsi üçün tapılan dərmanın Azərbaycanda istifadəsi ilə bağlı belə deyib:

“Bu barədə hələ ki, bizdə yenilik yoxdur. Əlavə məlumat olarsa, paylaşarıq”.


Paylaş: