Bu gün Azərbaycanda demək olar ki, hər kəs baş verən hadisələrdən yetəri qədər məlumatlı olur. Amma 7-8 il bundan əvvəl hər hansı bir xəbər saytında dövlət qurumları ilə bağlı xəbər çıxanda demək olar ki, onlara qarşı təzyiqlər olur, ortalıqda baş verən qanunsuzluqlar, korrupsiya və yeyinti kimi hallar ört-basdır olunmağa cəhd olunurdu. Ona görə də zamanında gizli qalan məqamlar yavaş-yavaş sosiallaşmağa başlayır. Sabiq Müdafiə Naziri Səfər Əbiyevin korrupsiya, oğurluq yolu ilə topladığı sərvətin və mülklərin sayını və hansı yollarla əldə etdiyi də artıq hamının dilindədir.

DİA.AZ-ın Qaynarinfo-ya istinadla verdiyi xəbərə görə, Səfər Əbiyevin ən yaxın adamlarından biri, keçmiş nazir müavini polkovnik Mehman Səlimovu tanıyan az deyil. M.Səlimov sabiq Nazirin tikinti və təmir büdcəsinə nəzarət edənlərdən biri idi. Orduda bütün tikinti işlərini görmək üçün M.Səlimovla müqavilə bağlanır və o özlərinə sərf edən tenderlərin qaliblərini şəxsən müəyyən edirdi. Sabiq nazirin postundan çıxarılması ilə M.Səlimov həbs olunmuş və ona qarşı bir neçə maddə üzrə cinayət işi açılmışdı. Onun bilavasitə iştirakı ilə misli görünməmiş tender maxinasiyasının nəticəsi olaraq, Heydər Əliyev adına Ali Hərbi Məktəbin əsas binasının damı hər güclü küləkdə uçurdu. İş o yerə gəlib çatmışdı ki, havalar küləkli olanda orda xidmət edən zabitlər və təhsil alan kursantlar binadan uzaq dururdular. Hələ milyonlarla pullar ayrılmış tədris korpusunu və kazarmaları demirəm. İzolyasıya edilməmiş binalar rütubət çəkir, divarlar nəmişlikdən kif bağlayırdı. Gələcəyin zabitləri belə kazarmalarda yaşayır və əksəriyyəti revmatizmdən əziyyət çəkirdi. Bir digər fakt isə, sabiq Müdafiə Naziri S.Əbiyevin dövründə Qusarda tikilib istifadəyə verilmiş hərbi hissədir. Hərbi tikilinin bünövrəsi standartdan 25 sm aşağı inşa edilmiş, üstündən heç 8 il keçmədən divarları çatlamış, bünövrə sarsılmış, hazırda isə qəzalı vəziyyətə düşmüşdür.
 30 oktyabr 2015-ci il tarixində S.Əbiyevin müavini Mehman Səlimovun məhkəmə prosesi keçirilmişdir. Bakı Ağır Cinayətlər Məhkəməsində "mənimsəmə və vəzifə səlahiyyətlərindən sui-istifadə etmə” maddəsi ilə təqsirləndirilən polkovnik M.Səlimova qarşı Müdafiə Nazirliyində "Layihə Smeta” bölməsinin o vaxtki rəisi Nəriman Niftəliyev də ifadə vermiş, dövlət tərəfindən hərbi qulluqçuların şəraitinin yaxşılaşdırılması üçün ayrılan pulların orada fəaliyyət göstərən şirkətlərə kağız üzərində göstərildiyindən daha çox, şişirdilmiş rəqəmlərdə rəsmiləşdirildiyini ifadə etmişdi. Daha çox pul mənimsəmək üçün fəhlə əvəzinə hərbi xidmətdə ola əsgərlər cəlb edildiyini bildirmişdi. Beləliklə həm əsgərlərin sağlamlığı və həyatı təhlükəyə atılır, həm də tikintidən anlayışı olmayan əsgərlər düzgün işləyə bilmirdi. Nəticədə, dövlətin pulları ciblərə axır, sonda isə yararsız, zəif, rütubətli, dözümsüz tikililər hərbi qulluqçuların sağlamlığına bais olurdu.

Orduda yarı-yarımçıq, qəzalı vəziyyətdə qoyduğu tikintilərdən mənimsədiyi pullarla isə özünə çoxlu sayda mülk inşa etdirən Səfər Əbiyev, təbii ki bunları əsgərlərə tikdiyi kimi bərbad vəziyyətdə deyil, müasir layihələrlə bahalı şirkətlərə tikdirib. Buna misal kimi Həsən Əliyev küçəsində yerləşən villaları, Teymur Əliyev küçəsindəki çoxmərtəbəli qoşa villaları, Həzi Aslanov qəsəbəsində hektarlarla torpaq sahəsi və villaları, Xəzər rayonu Şimal DRES ərazisində olan villa, Çexiyada şəxsi biznesi, Nabranda və Qubada villaları və 100 hektardan çox torpaq sahələrini göstərməklə bitirmək olmaz.


Paylaş: