2002-ci ilin aprelində Cavanşir Feyziyevin rəhbərliyi ilə fəaliyyətə başlamış və ölkədə ən böyük dərman monopolistlərindən sayılan "Avromed Company" QSC ilə bağlı qalmaqallar səngimir.

Koronavirus pandemiyası dövründə ölkədə dərman preparatları ilə bağlı yaranmış problem, bəzi preparatların çatışmaması, həmçinin apteklərdə tapılmaması və s. kimi hallar şirkətin adını yenidən gündəmə gətirib. Belə ki, Mingəçevirdə fəaliyyət göstərən bir neçə əczaçı - aptek sahibi şirkətin fəaliyyətindən şikayətçidir.

Onlar Afn.az-a deyiblər ki, şirkət koronavirusun müalicəsində istifadə olunan dərmanları onlara satmır: "Tarif Şurası tərəfindən qiyməti tənzimlənən virus əleyhinə "arbidol" pereparatının distribüteri olan "AvroMed" şirkəti bu pereparatı ancaq öz apteklərinə verir. Bizim kimi lisenziyası olan apteklərin sifarişini, depoda yoxdur deyə geri çevirirlər".

""Avromed" yaranmış durumdan istifadə edərək rəqib aptekləri sıradan çıxarmağa çalışır: "Ancaq hamımız bilirik ki, öz doktalarına (apteklərinə. red) əlaltdan bu pereperatı sifariş əsasında ötürür. Sadəcə, bizim doktalardan fərqimiz odur ki, onlar bütün dərmanları nağd satırlar, biz isə depoya nağd ödəniş etsək də, imkansız xəstələrimizə maaş, pensiya vaxtı hissə-hissə ödəmələrinə razılaşaraq nisyə veririk. Yəni bir sözlə, Tarif Şurasının qoyduğu qiymətə satsaq da, imkansız insanlarımızı geri çevirmirik. Son günlər dəfələrlə bu pereparat üçün kifayət qədər xəstə müraciət edib, ancaq depo sifarişimizi qəbul etmədiyi üçün yoxdur deməyə məcbur olmuşuq", - şikayətçilər deyiblər.

Əczaçılar bildiriblər ki, "Avromed" arbidolu həm də özəl klinikalara topdan baha qiymətə satır: "Dövlət tərəfindən 7 manat qoyulan qiymət indi 60-150 manat arasında dəyişir. Öz apteklərində bu qiymətə satırlar".

Cavanşir Feyziyev: "Bu şirkətlə heç bir əlaqəm yoxdur”

Milli Məclisin deputatı Cavanşir Feyziyev isə feybukda "Avromed" şirkətinin ona məxsus olmadığını bildirib.

O qeyd edib ki, 2016-cı ildə ona məxsus olan bütün səhmləri satıb: "Bəzi saytlarda adımın dərman preparatları ilə bağlı hallandırıblar. Guya "Avromed" koronavirus müalicəsi üçün istifadə olunan bəzi dərmanları yalnız öz apteklərinə verir. "Karlar, korlar və bir sıra reket saytları idarə edən dələduzlar üçün bir daha təkrar etməyə məcburam:
- birincisi, mən 2010-cu il dekabrın 1-dək "Avromed"in direktoru olmuşam. İndi isə 2020-ci ildir.
- ikincisi, 2016-cı ildə səhmlərin mənə məxsus olan hissəsini satmışam və mənim "Avromed" şirkəti ilə heç bir əlaqəm yoxdur.
- üçüncüsü, koronavirusa qarşı dərman preparatları vitamin deyil ki, aptekdə satılsın. Bu dərmanlar ancaq koronavirusun müalicəsi ilə məşğul olan xüsusi xəstəxanalara TƏBİB tərəfindən verilə bilər. Kimsə bu dərmanları əldə edib öz aptekində satmaq istəyirsə, deməli, möhtəkirlik etmək istəyir”.

Deputat 2012-ci ildə şirkət təsisçisi kimi memorandum imzalayıb

Cavanşir Feyziyev Milli Məclisin V çağırış deputatıdır. O, 2010-cu ildə 4-cü çağırış Milli Məclisə 115 saylı Şəki kənd ikinci seçki dairəsindən deputat seçilib. Amma deputat "Avromed"də özünə məxsus olan səhmləri 2016-ci ildə satdığını deyir. Bununla da o, deputat olduqdan sonra 6 il bizneslə məşğul olub.

Bunu deputatın biznes fəaliyyəti də təsdiq edir.

Arqument.az-ın araşdırmasına görə, Cavanşir Feyziyev 2012-ci ilin martın 2-də "Avro Med” şirkətinin təsisçisi, Milli Məclisin deputatı kimi Qafqaz Universitetində olub və Qafqaz Universiteti ilə "Avro Med” şirkəti arasında memorandum imzalayıb.

Cavanşir Feyziyevin "Avromed"in təsisçisi kimi Qafqaz Universitetindəki memorandumla bağlı çıxışı (2 mart, 2012)

Xəbəri isə dövlətin rəsmi agentliyi Azertac yayıb. Buradan aydın görünür ki, deputat "Avromed"lə əlaqələrinin olmadığını deməklə, manipulyasiyaya yol verir.

Bəs qanun nə deyir?

Azərbaycan Respublikası Konstitusiyasının 89-cu maddəsinin 4-cü bəndində konkret olaraq göstərilir ki, Milli Məclisinin (MM) deputatı sahibkarlıq, kommersiya və başqa ödənişli fəaliyyətlə məşğul olduqda (elmi, pedaqoji və yaradıcılıq fəaliyyəti istisna olmaqla) mandatından məhrum edilir. Ancaq buna baxmayaraq, Milli Məclisdə mandat sahibi olan deputatların bir qismi bizneslə məşğul olur. Cavanşir Feyziyev isə bu açıqlaması ilə Konstitusiyanı pozduğunu etiraf edib.

Baş redaktor: "Cavanşir Feyziyev dövlətin təhlükəsizlik sistemini tənə altında qoyur"

"Deputat Cavanşir Feyziyev AFN haqqında düzgün olmayan iddia səsləndirib. Guya AFN-i Eldar Mahmudovun yaratdığını və saytın onun çetesi tərəfindən maliyyələşdirildiyini deyib. Bu, bir deputat üçün olduqca böyük qüsur, ayıbdır ki, heç bir əsası olmayan fikri səsləndirir”.

Bunu AFN-in baş redaktoru Səbuhi Qafarov deyib.

O bildirib ki, Mingəçevirdə fəaliyyət göstərən əczaçılar tərəfindən "Avromed” şirkəti haqqında redaksiyaya daxil olan şikayət rəhbərlik etdiyi saytda ictimailəşdirilib: "Həmişə olduğu kimi, şirkətdən mövqe almaq üçün müraciət etdikdə Şəhla Mahmudova adlı xanımın e-mail ünvanını verdilər. Hansı ki həmin ünvandan bizim e-mail ünvanımıza Cavanşir Feyziyevin deputat kimi fəaliyyətini, müsahibələrini, rəy və şərhlərini göndərirlər. Bu baxımdan Şəhla Mahmudovanın həm deputatın, həm "Avromed”in PR işini aparması bütün məsələni açıb ortaya qoyur ki, Cavanşir Feyziyev birbaşa "Avromed”ə rəhbərlik edən adamdır. Üstəlik, ötən il Bakıda baş verən ölümlə nəticələnən qəzada "Avromed”in avtomobilini Cavanşir Feyziyevin şəxsi sürücüsünün idarə etdiyi ortaya çıxdı. Bu hələ bizə məlum olan tərəfləridir. Cavanşir Feyziyev indiyədək dəfələrlə şirkətin ona məxsus olmadığını bildirsə də, ortaya tutarlı dəlil-sübut qoya bilməyib. Ona görə də haqlı olaraq mediada "Avromed”in ona məxsus olması hələ də yazılır. Biz də əczaçıların şikayətlərini ictimailəşdirərkən Feyziyevin adını hallandırmışıq. Deputat isə qarşılığında AFN-i guya Eldar Mahmudovun yaratdığını, onun ətrafının maliyyələşdirdiyini deyib. Bu, nöqsan olmaqla bərabər, cinayətdir. Adam ölkənin qanunverici orqanında təmsil olunur, dəqiqləşdirilməmiş, doğru olmayan informasiya səsləndirir. Üstəlik, Eldar Mahmudov artıq 3 ildir ki, vəzifədən alınıb, zamanında onun ətrafında, buyruğunda olan şəxslər, saytlar, jurnalistlər hamısı aşkarlanıb, ifşa olunub. Deputat bu fikri ilə həm də hüquq-mühafizə orqanlarını, ölkənin təhlükəsizlik sistemini tənə altında qoyur. AFN ölkənin oxunan, izlənən saytlarından biridir. Artıq 6 ildir fasiləsiz fəaliyyət göstərir”.

S.Qafarovun sözlərinə görə, C.Feyziyevi yönəldənlərin kimliyini bilir: "Təəssüf ki, ona bizim həmkarlarımız istiqamət verir. Konkret olaraq modern.az saytının baş redaktoru Elşad Eyvazlı Cavanşir Feyziyevin "işləri” ilə məşğul olur. O, bir müddət əvvəl də deputatla bağlı AFN-də gedən yazıların çıxarılması üçün bizə pul təklif etmişdi. Ondan sonra modern.az-ın işçilərindən biri eyni təklifi etdi və biz hər dəfə imtina etdik. İndi də Cavanşir Feyziyev məhz Eyvazlının öyrətməsi ilə haqqımızda hədyan yazır, o da ona və orda bizə qarşı yazılan rəylərə dəstək verir. Bu, həmkar etikasına zidd hərəkətdir. Biz indiyədək nə heç bir həmkarımız haqda yazılan hər hansı yazını saytda verməmişik, nə də jurnalistlərə qarşı yazılan statuslara, aparılan kampaniyalara reaksiya verməmişik. Versək də, müdafiə mövqeyində olmuşuq. Elşad Eyvazlı isə artıq neçənci dəfədir ki, AFN haqqında yazılan yalan-böhtan yazıları saytında dərc etməklə yanaşı, indi də təhqir olunduğumuz rəylərə eşqlər yağdırır. Adam Parlament Jurnalistləri Birliyinin sədri, sayt baş redaktorudur, daim deputatların mövqeyindən çıxış edir. Sanki həmkarları biz deyilik, deputatlardır. Niyə? Səbəb nədir? Bunu anlamaqda çətinlik çəkirik”.


Paylaş: