Gədəbəy rayonu Azərbaycanın iqliminə görə ən səfalı bölgələrindən biridir. Bu ərazidə turizmin və kənd təsərüfatının inkişafı üçün geniş imkanlar var. Amma bu imkanlardan nə dərəcədə istifadə olunur? Rayon rəhbərliyi Gədəbəyin inkişafı üçün nə dərəcədə məhsuldar işləyir?

Həmsöhbətimiz olan Gədəbəy rayon sakinlri bildirir ki, Gədəbəy rayon icra hakimiyyətinin başçısı İbrahim Mustafayev prezident İlham Əliyevin yürütdüyü siyasətlə deyil, özünün şəxsi qohumluq və dostluq siyasəti ilə fəaliyyət göstərir və bu vəziyyət indiyə kimi davam edir. Ölkə rəhbəri gəncləşmə siyaysəti apardığı bir dönəmdə İbrahim Mustafayev 70 yaşlı şəxsi və saxta diplomu olanları, Əmək Məcəlləsinin 70-ci maddəsinin Ç bəndi ilə işdən azad olunanları vəzifəyə təyin edir.

Gədəbəy Rayon Təhsil Şöbəsinin keçmiş müdiri Baxış Nağıyev bu qəbildən olanlardandı. Baxış Nağıyevin Təhsil Şöbəsindən uzaqlaşdırmağın da xüsusi tarixçəsi var. İbrahim Mustafayev icra başçısı təyin olunan kimi Təhsil Nazirliyinə təqdimat göndərərək Baxış Nağıyevi 65 yaş həddi vəzifədən uzaqlaşdırmağı tələb etmişdi. Öz növbəsində Baxış Nağıyev də kreslosunu itirməmək üçün hərəkətə keçmişdi. YAP-ın Gədəbəy rayon təşkilatının müdiri və Baxış Nağıyevin qohumu olan Rüstəm Nağıyev rəhbəri olduğu təşkilat adından prezidentə məktub ünvanladı. Həmin məktubda Baxış Nağıyevin Gədəbəy təhsilində perspektivli kadr olduğu bildirilmişdi. Baxış Nağıyev məktubun prezidentə verilməsinə nail olmuşdu. Məktub Prezidentə həmin dönəmdə Sabunçuda vətəndaşlarla görüşü zamanı verilmişdi. Bu məktubdan sonra B.Nağıyev bir müddət təhsil müdiri kimi vəzifədə qaldı. Nəticədə İbrahim Mustafayev sözügedən şəxsi vəzifədən kənarlaşdırmağa nail oldu. Bir neçə ay işsiz qalan Baxış Nağıyevi İbrahim Mustafayev Gədəbəy rayon Qaradağ kəndinə icra nümayəndəsi təyin etdi. Sual yaranır ki, niyə İbrahim Mustafayev 65 yaş həddi ilə vəzifədən uzaqlaşdırdığı 69 yaşlı Baxış Nağıyevi icra nümayəndəsi təyin etdi?

Növbəti dostluq və qohumluq münasibətilə vəzifəyə gələn Əkbər Kazımov oldu. İbrahim Mustafayev icra başçısı təyin olunanda Ə. Kazımovu Bakıdan özü ilə gətirmişdi. Hədəf icra hakimiyyətində birinci müavin işləyən Qüdrət Paşayevi işdən azad edərək həmin posta Ə. Kazımovu təyin etmək idi. İlk addım uğurlu oldu. Paşayevin pensiya yaşı çatdığından işdən azad edildi. Lakin Ə. Kazımovun dövlət qulluğu stajı olmadığına görə,o, birinci müavin təyin edilmədi. Belə halda İ. Mustafayev Əkbər Kazımovu Kommunal Müəssisələri Kombinatı (JEK) müdiri təyin etdi. Əkbər Kazımovun nəzarətində olan DOST MMC-nin onlarla işçilərinin kartı öz sahiblərində deyil. Bu yaxınlarda isə DTX-nın məlum addımlarından sonra bank kartları sahiblərinə icra nümayəndələri vasitəsilə qaytarılır. Həmin işçilərdən mənimsənilən pullar hesabına Əkbər Kazımov Gədəbəy rayon Poladlı kəndində özünə villa tikdirməyə başlayıb.

DOST MMC-yə işçiləri 500-1000 manat müqabilində qəbul edirlər. İbrahim Mustafayevin yaxın dostu və icra hakimiyyətinin özündə fəaliyyət göstərən Ləzgi adlı şəxsin həyat yoldaşı həmin məbləği vətəndaşdan açıq-aşkar istəmişdi. Ləzgi müəllimin icra nümayəndəsi olan həyat yoldaşı vətəndaşa zəng edərək bildirmişdi ki, 1000 manat verin, sizi DOST MMC-yə işə düzəldim. Vətəndaş həmin xanımın səsini yazaraq İbrahim Mustafayevə təqdim etmişdi. Xanım işdən azad olunsa da, Ləzgi müəllim dostluq naminə hələ də işləyir.

DOST MMC-yə işçilərin rüşvət qarşılığında götürülməsi barədə sabiq deputat Nazim Bəydəmirli öz Facebook hesabında yazmışdı. Bəydəmirli bildirir ki, işçiləri işə götürmək üçün öncədən 650 manat pul alırlar.

N. Nağıyev 2000-ci ilin mayında keçmiş icra başçısı Ramiz Bağırov tərəfindən Əmək Məcəlləsinin 70-ci maddəsinin "Ç" bəndi ilə ilə işdən azad edilib. Həmin maddənin "Ç" bəndi ilə işdən azad olunan şəxslər bir daha dövlət qulluğunda işləyə bilməz. Lakin Natiq Nağıyev 2006-cı ildə əmək kitabçasını dəyişdirməklə yenidən dövlət işində fəaliyyət göstərməyə başladı. 6 il ərzində isə mərhum şair İlyas Tapdığa sürücülük edib. Əmək Məcəlləsinin "Ç" bəndi ilə işdən qovulanın birinci müavin təyin edilməsinin pərdəaxrası məqamları var.

Növbəti dostluq münasibəti ilə işə qəbul olunan Samanlıq kənd icra nümayəndəsi Səfərov Rizvan Xudaverdi oğludur. R.Səfərov İbrahim Mustafayevin tələbə yoldaşıdır. Hətta 16.10.2018-il tarixində sözügedən kənddə cari və əsaslı təmir adı altında dövlət büdcəsindən 148.018 manat pul ayrılır. Lakin nə görülən iş, nə də işi icra edən şirkət var.

Bundan başqa saxta diplomlu şəxslər İbrahim Mustafayevin təyinatı ilə hazırda dövlət işində işləyir. Həmin şəxslərdən biri Ərtəpə icra nümayəndəliyində müavin işləyən Məmmədəliyev Sərxan Cavanşir oğludur. Sərxan Məmmədəliyev Gədəbəy rayon Uşaq Yaradıcılıq İnkişaf Mərkəzinin direktoru olarkən saxta diplomu olduğuna görə, Gədəbəy rayon Təhsil Şöbəsinin həmin dönəmdəki müdiri Baxış Nağıyev tərəfindən məhkəməyə verilib. Sözügedən şəxsin diplomunun saxta olduğu məhkəmə qərarı ilə sübuta yetirilib. Buna baxmayaraq hazırda vəzifə icra edir.

Buna bənzər hal hazırda Gədəbəy şəhər icra nümayəndəsi olan Şakir Məsimov ilə də baş verib. Baxış Nağıyev Gədəbəy rayon Təhsil Şöbəsinin müdiri işləyən zaman Düzyurd kənd orta məktəbinin direktoru vəzifəsini icra edən Şakir Məsimovu Əmək Məcəlləsinin 70-ci maddəsinin "Ç" bəndi ilə işdən azad edilib. Məsimov hazırda Gədəbəy şəhər icra nümayəndəsi işləyir.

Gədəbəy rayon Peşə Məktəbinin direktoru olan Nahid Allahverdiyev korrupsiya hallarına yol verdiyinə görə işdən azad olunub. Ona qarşı korrupsiyaya dair maddə ilə cinayət işi də açılmışdı və Əmək Məcəlləsinin 70-ci maddəsinin Ç bəndi ilə işdən azad olunmuşdu. Həmin şəxsi İbrahim Mustafayev Gədəbəy rayon Söyüdlü kənd icra nümayəndəsi təyin etdi.

Rüşvət faktlarını Ərtəpə kənd icra nümayəndəsinin keçmiş müavini Elşən Məmmədov da təsdiq edir. O, deyir ki, İbrahim Mustafayev kadrları rüşvətlə təyin edir və əksəriyyəti heç işə çıxmır. Bu cür rüşvət halları sahibkar obyektlərində də geniş vüsət alıb. Adının çəkilməsini istəməyən bir sahibkar bildirir ki, rayonun mərkəzindəki 4 mərtəbəli obyektin tikintisi üçün İbrahim Mustafayev ilk olaraq 25.000 manat rüşvət alıb. Bununla kifayətlənməyən İH rəhbəri sonradan 13 000 manat da alıb. Lakin həmin obyektin tikintisini digər aidiyyatı qurumlar təsdiq etmir deyə, İ.Mustafayev tikintini dayandırıb.

Gədəbəyin mərkəzində günorta saatlarına kimi sıxlıq olduğundan bir Post Patrul Xidməti maşını daim mərkəzdə xidmət aparır. Həmin yolda hərbi maşınları mütəmadi hərəkət etdiyinə görə, polis belə bir xidməti öz üzərinə götürüb. İ. Mustafayevin icazəsi ilə tikilən və yarımçıq qalan həmin 4 mərtəbəli obyekt fəaliyyətə başlasa rayon mərkəzindən hərbi maşınlarının hərəkəti qeyri-mümkün olacaq. Bu əsas magistral yolun kəsilməsinə səbəb olacaq.

Gədəbəy rayonu ərazisində dövlət büdcəsindən ayrılan pullar da təyinatı üzrə xərclənmir. Son iki il ərzində Gədəbəyə dövlət büdcəsindən 4.5 milyon manat pul ayrılıb. Həmin vəsaitin bu günə kimi haraya xərcləndiyi barədə heç bir məlumat və hesabat yoxdur. Həmin pullar qalmaqallı tenderlərin qalibi olan "Azərtranss" MMC vasitəsilə yoxa çıxıb. Nizamnamə kapitalı 20 manat olan "Azərtranss" MMC Gədəbəy icra hakimiyyəti binasının tikintisini və rayonun mərkəzinin abadlaşdırılmasını həyata keçirməli idi. 1 kvadratı metri 4333 manata başa gələn icra hakimiyyətinin binasının tikintisində texnika olaraq Gədəbəy rayon Mənzil Kombinatı Müəssisənin texnikalarından və DOST MMC-nın işçilərinin fiziki əməyindən istifadə olundu. DOST MMC-nin içşilərindən etiraz edən olanda, həmin şəxsləri işdən azad etməklə təhdid edirdilər.

Qaldırılan məsələlərə Gədəbəy icra hakimiyyəti başçısının münasibətini öyrənmək üçün ona e-mail vasitəsilə rəsmi sorğu ilə müraciət etdik. Amma sorğunun üstündən bir xeyli müddət keçsə də ona nə cavab verildi, nə də cavabın hazırlandığı barədə məlumat aldıq. Bununla belə qarşı tərəfin fikirlərini vermək niyyətində olduğumuzu bildiririk. //anews.az//


Paylaş: