Ermənistan ordusunda sentyabrın 27-dən bu günə qədər davam edən müddətdə baş verən qiyamların sayı sürətlə artmaqdadır. Qarabağ cəbhəsində törətdiyi təxribatlarla “öz qazdığı quyuya düşən” təcavüzkar ölkə artıq bu qiyamın qarşısını almaqda acizlik çəkir. Erməni hərbçilər ön cəbhəyə gedib, Azərbaycan Ordusunun sarsıdıcı zərbələri qarşısında məhv olmaq istəmirlər.

Döyüş üçün səfərbərliyə alınanlar nəinki ordudan yayınmaq üçün bütün yollara əl atırlar, hətta açıq şəkildə müqavimət göstərirlər. Bir sözlə, ermənilər başqasının torpağında döyüşüb məhv olduqlarını görməmiş deyillər.

Heç şübhəsiz ki, bu durum işğal altındakı torpaqlardan mənfur düşməni təmizləmək üçün Vətən müharibəsi başladan Azərbaycanın işinə tam yarayır. Mövcud durumun düşmən cəbhədə nə vaxta qədər davam edəcəyi, erməni ordusunu nələrin gözlədiyi, eləcə də, Azərbaycanın əks tərəfdəki bu qiyamlardan necə yararlanamalıdır yönündə çoxsaylı müzakirələr gedir.

Siyasi şərhçi Əhəd Məmmədli “Yeni Müsavat”a açıqlamasında erməni ordusunda baş verənlərdə təəccüblü heç nəyin olmadığını söylədi: “Ermənilərin bu vəziyyəti Azərbaycanın işğal altındakı əraziləri tam şəkildə azad olunana, Şuşa tam şəkildə nəzarətimiz altına keçənə qədər davam edəcək. Gördüyünüz kimi, ordumuz əsas iki istiqamətdə güc ortaya qoyub. İranla dövlət sərhədi nəzarətə götürülüb. İndi isə Ermənistanla dövlət sərhədi və Şuşa məsələsi həll olunmalıdır. Bu həll olunandan sonra düşmən güzəştlərə getməyə məcbur olacaq. Əslində son bir ayda gedən proseslər onu göstərdi ki, məsələ sürətlə bitməyə doğru gedir. Bu müharibə üçün böyük müddət deyil. Azərbaycanın istəyi artıq həyata keçməkdədir. Erməni ordusunun nə vəziyyətdə olduğu müharibədən bu günə qədər keçən müddətdə özünü açıq göstərdi. Bu ordu bütün cəhətlərdən Azərbaycan Ordusu ilə müqayisə oluna bilməz. Biz öz torpaqlarımız, onlar isə işğal etdikləri ərazilər uğrunda mübarizə aparırlar. Düşmənin hərbçilərinin ön xətdə getməkdən yayınmaları, döyüş meydanından qaçmaları hər şeyin sübutudur. Bu hal bundan sonra da davam edəcək. Onların bir qismini sadəcə indiyə qədər inandıra bilmişdilər ki, Qarabağ onların torpağıdır. Bu fikir darmadağın edildi. Azərbaycan hərb meydanında və diplomatik sahədə bunları etdi. Fanatik, ideoloji cəhətdən onlar buna inanırdılar. İnanırdılar ki, öz torpaqları uğrunda döyüşürlər və ölürlər. Onların döyüş qabiliyyətləri yoxdur. Havadarlarından bir çoxlarının erməniləri tərk etmələrindən sonra düşmən hansı vəziyyətə düşdü, hamımız gördük. Sadəcə, erməni ordusunda mif yaradılmışdı və Azərbaycan Ordusu ciddi güc tətbiq etmədən bu mifi məhv etdi. Artıq onlar reallıqlarla barışıblar, sadəcə, son çabalarını sərf edirlər”.

Prezident yanında Qeyri-Hökumət Təşkilatlarına Dövlət Dəstəyi Şurasının üzvü, Tərxis Olunmuş Hərbçilərin Gəncləri Maarifləndirmə İctimai Birliyinin sədri, hərbi ekspert Emin Həsənli məsələni bu cür şərh etdi: “Azərbaycan Ordusu peşəkar ordudur. Böyük nailiyyətlər əldə edib. Düşmənin ordusu zəif idi. Onların təriflədiyi xüsusi təyinatlıları, kəşfiyyat qrupları, illərlə hazırladıqları istehkamlar darmadağın edildi. Bunu erməni hərbçilər yaxşı görür. Bunun üçün də ölmək istəmirlər. Onlar görürlər ki, Azərbaycan Ordusunun zəif olması barədə onlara deyilənlər yalandır, əksinə güclüdür, sadəcə, uydurulan xülyalara inanıblar. Deyilənlərin əksini görəndə ordu dözə bilmir. Getdikcə erməni ordusunda qiyamlar artacaq. Hakimiyyət böhranından sonra dövlət böhranının şahidi olacağıq. Bu, qaçılmazdır. Ermənilərin orduya gəlməmələrinə səbəblərdən biri də bu orduda ruh düşkünlüyünün həddindən artıq dərinləşməsidir. Yüksəkliklər bir-birinin ardınca əldən verilir, texnikalar sıradan çıxarılır. Onların Qarabağda məzarlığı ola bilməz. Çünki məzarlıq müqəddəs yerdir. Onlar cəhənnəmdədirlər, ayaqlarının altı od tutub yanır. Erməni əsgəri yaxşı bilir ki, Qarabağa gəlsə məhv olacaq. Bunun üçün ordudan yayınır. Erməni cəmiyyəti, hərbiçiləri və onları idarə edənlər başa düşürlər ki, məğlubiyyətin astanasındadırlar. Biz bunu futbolla əlaqələndirsək, ikinci hissənin ortalarından sonra böyük hesabla uduzan komanda bilir ki, artıq oyunu xilas etmək olmaz, bunun üçün topu ora-bura vurur. Ermənilərin mülki əhalimizi atəşə tutmaları bunun kimi bir şeydir. Düşünürlər ki, bu cür çirkin yollarla nəyəsə nail olacaqlar, yanılırlar. Bundan sonra onların qazanacaqları bir şey qalmayıb. Sona qədər gedib, torpaqlarımızı azad edəcəyik. Nəticələr ortada olandan, yeni-yeni nəticələr Azərbaycan Ordusu qazanandan sonra erməni ordusunda qiyamlar getdikdə artır, insanlar orduya gəlib döyüşmək istəmirlər, nəticələr qazanacaqlarına inanmırlar. Əks tərəfdə, yəni Azərbaycan tərəfdə isə xalqın və ordunun böyük əhval-ruhiyyəsi var. Azad olunan torpaqlar ard-arda açıqlanır. Bunu ermənilər həzm edə bilmirlər. Amma başqa çarələrinin qalmadığını da görürlər.

İndi 90-cı illərin əvvəlində olan vəziyyət deyil. Bunu Ermənistan tərəfi yaxşı görür. İşğal və məğlubiyyəti gizlədə bilmirlər. Hətta taktiki, qismən geri çəkilmə kimi gülünc oyunlar qurub, erməni cəmiyyətindən nəyisə gizlətmək istədilər. Amma sonda qondarma rejimin rəhbərliyi, eləcə də, Ermənistan rəhbərliyi həqiqətləri etiraf etmək zorundadırlar. Rusiyadakı məşhur erməni milyonçusunun Paşinyana etdiyi müraciət hər şeyin sübutudur. Ermənistan daxilindən də erməni baş nazirə edilən müraciətlər az deyil. Məğlubiyyəti yaşayandan sonra onları qarşı hələ siyasi, iqtisadi böhran gözləyir. Bu da sonunda hakimiyyət böhranı ilə nəticələnəcək. Biz bundan sonra tez-tez Ermənistanda hakimiyyət çevirilişlərinin şahidi olacağıq. Düşmən ölkə bu müharibədə hərbi və iqtisadi cəhətdən 30-50 il geri atılıb. Biz torpaqlarımızı azad edəndən sonra bölgənin ən güclü dövlətinə çevriləcəyik. Ermənistanın vaxtında şansı var idi. Qərbində Türkiyə, şərqində Azərbaycan kimi böyük dövlətlə əməkdaşlıq edib, təcavüzkar siyasətinə son qoya bilərdi. Amma onlar normal bir ölkə kimi yaşamaq istəmədilər. Ermənistanda ağlı başında olan adamlar oranı tərk edib gedəcəklər".
“Yeni Müsavat”


Paylaş: