Ölkə Prezidentinin 06.10.2015-ci il tarixdə açlışını etdiyi Göyçay rayon Mərkəzi Xəstəxanası əsaslı təmir olunaraq əhalinin xidmətinə verilib. Rayon Mərkəzi Xəstəxanası ən müasir şüa-diaqnostika, rentgen, kompyuter-tomoqrafiya kimi tibbi avadanlıqlarla təmin olunub.

Sfera.az-a rayondan daxil olan şikayətlərdə isə bildirilir ki, amma bunun rayon sakinlərinə bir faydası toxunmur. Çünki pandemiyanın geniş yayıldığı bir dövrdə Göyçay RMX-nın direktoru Elçin Bilalovun yarıtmaz fəaliyyəti nəticəsində Göyçay əhalisi şüa-diaqnostika (KATE) avadanlığından istifadə edə bilmir.

Belə ki, müayinədən keçməyə gələn vətəndaşların bir hissəsinə sözügedən tibbi avadanlığın sıradan çıxdığını, bir hissəsinə isə müayinəni həyata keçirən tibb işçisinin COVİD-19 yoluxduğunu bildirirlər.

Məsələnin əsli isə fərqlidir. Xatırladaq ki, Göyçay RMX-da təchiz edilmiş şüa-diaqnostika (KATE) tibbi avadanlığı Göyçay əhalisi üçün pulsuzdur. Bu da bəzi işbazlara sərf etmir. Buna görə də məqsədli şəkildə şüa-diaqnostikanın (KATE) fəaliyyəti dayandırılıb ki, Göyçay rayonunda fəaliyyət göstərən Bioloji Təbabət Klinikası rahat şəkildə şüa-diaqnostika (KATE) müayinəsinə görə hər xəstədən 90 manat pul ala bilsin.

Gün ərzində Bioloji Təbabət Klinikasına sözügedən müayinədən keçmək üçün yüzdən çox şəxs müraciət edir ki, həmin şəxslərin hər biri məcburdur ki, tələb olunan 90 manatı versin. Ehtimal olunur ki, Bioloji Təbabət Klinikası Göyçay RMX-da şüa-diaqnostika (KATE) avadanlığının əhalinin istifadəsinə verilməməsinə görə E.Bilalova "şirinlik” verir. Belə olan halda Elçin Bilalov üçün heç də maraqlı olmaz ki, Göyçay RMX-da şüa-diaqnostika (KATE) avadanlığının fəaliyyəti bərpa olunsun.

Amma rayonda COVİD-19 virusuna yoluxmuş şəxslərin heç də hamısının imkanı çatmır ki, 90 manat ödəyərək, şüa-diaqnostika (KATE) avadanlığı vasitəsi ilə müayinədən keçsin.


Paylaş: