"Bu təklifləri müsabət qarşılayıram”.

Bu sözləri Sfera.az-a açıqlamasında Azərbaycanda "qızıl amnistiya”nın elan edilməsi təklifini dəyərləndirərkən hüquq müdafiəçisi Səadət Bənənyarlı deyib:

"Hüquq Müdafiəçilərinin Monitorinq Qrupu da təklif edib ki, ölkədə "qızıl amnistiya” elan edilsin.Bu amnistiya olduqca geniş spektri əhatə etməlidir. Ümumiyyətlə, hər bir amnistiya aktı hüquq müdafiəçiləri üçün də müsbət hadisədir. Yaxşı olar ki, "qızıl amnistiya” ilə siyasi məhbus məsələsinə də birdəfəlik son qoyulsun. Həmişə bunu vurğulamışıq. Lakin inanmıram ki, bir qızıl amnistiya keçirməklə siyasi məhbus məsələsinə birdəfəlik son qoyulacaq. Amma cəmiyyətdə gedən proseslər bu istiqamətdə addım atılmasını zəruri edir. Bunun üçün ölkədə müsbət şərait də yaranıb. Birliyəçağırış baxımından belə bir amnistiyanın olması vacibdir”.

"Ora elə maddələr salınmalıdır ki...”

Bunu isə sayta açıqlamasında Dilarə Əliyeva adına Qadın Hüquqları Müdafiə Cəmiyyətinin sədri Novella Cəfəroğlu bildirib:

"Böyük amnistiya həyata keçirilsə, çox insan azadlığa qovuşar. Bu zaman ora elə maddələr salınmalıdır ki, siyasi motivlə həbs edilənlərə də şamil edilsin. Yəqin, hökumət əldə edilən qələbədən sonra bu istiqamətdə də hərəkətə keçəcək. Bunu etsələr yaxşı olar. Bunu etməklə hökumət ölkəmizdə hərtərəfli dəyişikliklərin baş verdiyini bütün dünyaya göstərə bilər”.

"Zamanı gələndə, olacaq”

Bunu isə Milli Məclisin deputatı Aydın Mirzəzadə söyləyib: "Əslində ölkəmizdə bu günə qədər verilən amnistiyaların hamısı "qızıl amnistiya”dır. Kifayət qədər çox sayda həbsdə olan insanların qapısı açılıb. Yaxud, istintaq işi aparılanların işi dayandırılıb. Yəni, Azərbaycanda vaxtaşırı olaraq bu istiqamətdə addımlar atılıb.

Zamanı gələndə növbəti amnistiyanın olacağı da tamamilə gözləniləndir. Koronavirus pandemiyası başlayandan Ədliyyə Nazirliyi tərəfindən bir çox məhbuslar məhkəmə vasitəsilə azadlığa buraxılıb. Azərbayanda siyasi məhbus yoxdur. Konkret cinayətə görə həbs edilən insanlar var. Onlar törətdikləri əmələ görə, verilən cəzanın çəkmə müddətinə, eyni zamanda, cəmiyyət üçün təhlükəli olmadıqda hər bir məhbusun azadlığa çıxmaq hüququ vardır”.

"Olmalıdır, amma...”

ASDP sədri Araz Əlizadə məsələyə bir qədər fərqli yanaşdı: "Qızıl amnistiya olmalıdır, bu normaldır. Allah hamının qapısını açsın. Amma ölkədə siyasi məhbus yoxdur. Bu mənada amnistiyanın verilməsinin tərəfdarıyam, amma siyasi məhbus sözü oradan çıxarılmalıdır”.


Paylaş: