Dünya Bankından bildirilib ki, Azərbaycanda avtomobil yanacağının, eləcə də su təchizatının tariflərinin (100 faiz) artmasına baxmayaraq, inflyasiya, çox güman ki, Mərkəzi Bankın hədəf diapazonu çərçivəsində qalacaq.

Dünya Bankının iqtisadçılarının fikrincə, sözügedən tariflərin artması daha yüksək qiymətlərə yol açacaq.
Qeyd edək ki, Azərbaycan Mərkəzi Bankının sədri Elman Rüstəmov faiz dəhlizinin parametrlərinə dair sonuncu mətbuat konfransında ölkədə inflyasiyanın 2021-ci ildə 4 faiz diapazonunda formalaşacağını bildirmişdi.

Xatırladaq ki, 2020-ci ildə Azərbaycanda inflyasiya 2,8 faiz təşkil edib, təkcə yanvar ayında isə illik inflyasiya 3,3 faizə bərabər olub.

Dünya Bankının açıqlaması ilə bağlı “Şərq”ə şərh verən iqtisadçı-ekspert Kazım Məmmədov sözügedən tarif artımlarının ölkədə bütün qiymətlərdə artıma səbəb olacağını bildirdi:

“Əvvəla, inflyasiyaya təsir edən amilləri xarakterizə edərkən məsələyə bir qədər geniş yanaşmaqda fayda var.
Birincisi, inflyasiya ölkə həyatının bütün sahələri ilə sıx surətdə bağlıdır.

Siyasi proseslər, iqtisadi dəyişikliklər, beynəlxalq münasibətlər və s. inflyasiya səviyyəsinə operativ formada təsir göstərmək qabiliyyətinə malikdir.

Doğrudur, bu gün benzin, dizel və ya suyun tariflərinin artmasına baxmayaraq, Mərkəzi Bank inflyasiyanı hədəf diapazonunda idarə etməyə çalışacaq, lakin inflyasiya səviyyəsinə təsir göstərən digər amillər (Bu gün Regional və beynəlxalq münasibətlər də qaynar hərəkətlilik göz qabağındadır) bu hədəfin bir qədər aşmasına səbəb olacaq.

İstənilən halda yuxarıda qeyd etdiyimiz tarif artımları bütün qiymətlərdə artıma səbəb olacaq. Yeri gəlmişkən, biz artıq bu artımları açıq-aşkar hiss etməkdəyik. İqtisadi münasibətlər bir çox hallarda inzibati təsirlərin həddən çox olmasından dolayı öz təbiiliyini itirir, bu da zamanla öz təsirini göstərir”.


Paylaş: