Ötən gün redaksiyamıza müraciət edən İkinci Qarabağ müharibəsinin qazisi, Bakı şəhəri, Yasamal rayon sakini, 1996-cı il təvəllüdlü Nurlan Sail oğlu Məmmədov 44 günlük savaşdan sonra üzləşdiyi problemlə bağlı məlumat verib.

Belə ki, Füzuli, Cəbrayıl, Xocavənd və Şuşa uğrunda gedən döyüşlərdə iştirak etdiyini deyən Nurlan Məmmədovun sözlərinə görə, o, ötən ilin oktyabr ayının ortalarında Füzuli istiqamətində yalanıb: “Yaralandıqdan sonra bir neçə kilometr arxada yerləşən səhra tipli səyyar tibb məntəqəsinə yollanmışam. Orada belə uyğun görülüb ki, hospitala getməyim. Qeyd edim ki, ümumilikdə 4 qəlpə yarası almışam, 3-ü sıyırıb, 1-i isə sol ayağıma girib. Tibb məntəqəsində qəlpəni çıxardılar, sarğı qoydular və 2 gün sonra yenidən taborun tərkibinə qatılmışam. Daha sonra döyüş yolum Cəbrayıl, Xocavənd və Şuşaya qədər uzantı. Lakin müharibədən sonra belə bir məsələ ortaya çıxdı ki, hospitalda olmadığım, yəni ordan sənədim olmadığım üçün mənə heç kim travma, yəni döyüşdə xəsarət almağım haqqında arayış vermir”.

Üzləşdiyi problemlə bağlı Müdafiə Nazirliyinə, “Papanin” hospitalı kimi tanınan Silahlı Qüvvələrin Baş Klinik Hospitalına, Səfərbərlik və Hərbi Xidmətə Çağırış üzrə Dövlət Xidmətinin Yasamal Rayon İdarəsinə, Azərbaycan Respublikası Silahlı Qüvvələrinin Təlim-Tədris Mərkəzinə (keçmiş Salyanski kazarma-red.) müraciət etdiyini vurğulayan qazi bildirib ki, bunun da müsbət nəticəsi olmayıb: “Nəzərinizə çatdırım ki, “Salyanski kazarma”da müharibədən gələn könüllülərlə bağlı bir heyət təyin olunmuşdu ki, problemlər həll olunsun. Orada müraciət etmişəm, amma heç bir müsbət nəticəsi olmayıb. Hərbi hissənin həkimləri deyirlər ki, sənə Forma 11, yaxud travma haqqında arayış vermək üçün bizə hospitaldan sənəd lazımdır. Eyni zamanda, hospital da həmin hərbi hissənin sənədini tələb edir. Məhz buna görə də mən indiyədək travma almağım haqqında arayış əldə edə bilməmişəm. Qeyd edim ki, bu proses təxminən, 4 aydır davam edir. Ancaq hələ də nəticə əldə olunmayıb”.

Sonuncu dəfə bir neçə gün öncə Müdafiə Nazirliyinin Tibb Baş İdarəsinə müraciət etdiyini deyən Nurlan Məmmədovun bildirdiyinə görə, bu dəfə də onu hərbi hissəyə yönəldiblər: “Hərbi hissədən isə deyirlər ki, yenidən “Papanin” hospitalında (Silahlı Qüvvələrin Baş Klinik Hospitalı-red.) tibbi ekspertizaya düşmək lazımdır. Bu üçün də bugünlərdə yenidən Səfərbərlik və Hərbi Xidmətə Çağırış üzrə Dövlət Xidmətinin Yasamal Rayon İdarəsinə müraciət edəcəm. Çox güman, orada ərizə yazdıracaqlar və bir həftə gözləyəcəm ki, mənə göndəriş versinlər. Bundan sonra isə artıq “Papanin” hospitalında nə deyəcəklər, özləri bilərlər. Onu da qeyd edim ki, “Papanin” hospitalına gedəndə cərrah demişdi ki, mən nə bilim sən “kravat”dan yıxılıbsan, yoxsa bu qəlpə yarasıdır. Mənim faktiki olaraq, Qarabağ müharibəsində qanım axıb, ancaq buna baxmayaraq, hərbi biletimə “döyüş ərəfəsində yaralanıb” cümləsini yazdıra bilmirəm”.

Sonda qəzetimiz vasitəsiylə ölkə başçısına müraciət edən İkinci Qarabağ müharibəsinin qazisi Ali Baş Komandan üzləşdiyi problemin həllində yardımçı olmasını xahiş edib: “Biz məhz Ali Baş Komandanın əmri ilə döyüşlərə qatılmışıq və bu səbəbdən də ümid edirəm ki, ölkə başçısı sadə bir sənədə görə bu qədər əziyyət çəkməyimə biganə qalmaz”. //hurriyyet.az//



Paylaş: