Bakı Şəhər İcra Hakimiyyətinin (BŞİH) sabiq Aparat rəhbəri Rasim Quliyevin həbsindən bir neçə gün əvvəl hakimiyyətə “xidmətlərini yada salan”, həbsdən sonra isə yenidən kölgəyə çəkilən Hacıbala Abutalıbovun “kəfəni yırtdığı” iddiaları var. Baxmayaraq ki, bu işdə əksər ekspertlər əsas suçlu kimi sabiq merin adını çəkirlər.

Deyirlər ki, Rasim Quliyev istəsəydi belə, Hacıbala Abutalıbovun xəbəri olmadan Nəsimi rayonu, Dilarə Əliyeva küçəsi 141 ünvanında yerləşən yaşayış binalarının, habelə yerli əhəmiyyətli mədəniyyət abidəsi kimi dövlət tərəfindən mühafizə olunan yaşayış evinin sökülməsi və yeni yaşayış binalarının tikintisinə dair “FF-2011" Mənzil Tikinti Kooperativinə icazə verə bilməzdi. Bundan başqa, Rasim Quliyev sənədə imza atsa da, Bakı Şəhər İcra Hakimiyyətinin möhürü Hacıbala Abutalıbovun əlində olub. Yəni Rasim Quliyevi imzası, Hacıbala Abutalıbovun möhürü olmadan heç bir qüvvəyə malik olmayıb.

Vaşinqtonda mənzillənən “Global Financial İntegrity” təşkilatının son hesabatına görə, 2004-2013-cü illər ərzində Azərbaycandan orta hesabla hər il 9.5 milyard dollar kapital qanunsuz çıxarılıb. Təşkilatın məlumatına görə, bununla bağlı Azərbaycan 144 ölkə arasında 17-ci yerdədir...

Sonrakı illərdə ölkədən qanunsuz yollarla çıxarılan vəsaitlərin həcmi azalsa da, tendensiya davam edib. Vaxtaşırı yerli və beynəlxalq media qurumlarında Azərbaycan məmurları Böyük Britaniya, Fransa, İtaliya, ABŞ və s. ölkələrdə yaratdıqları şirkətlər, aldıqları bahalı daşınmaz əmlaklarla gündəmə gəlirlər.

Zaman keçdikcə vəzifə sahibləri hakimiyyətdən qovulsalar da, topladıqları hüdudsuz sərvətin bir hissəsi əllərində qalır və onu idarə edirlər. Bəs Hacıbala Abutalıbov var-dövlətini harada gizlədib? Onun əsas əmlakının həm də Bakıda tikilən hər binadan bir neçə mənzil “hədiyyə” alması olub. Ona bu “xəstəliyinə” görə “mənzil baronu” da deyiblər.

Hacıbala Abutalıbovun adı mer olduğu illərdə daim qanunsuzluqlarda, vəzifə səlahiyyətlərindən sui-istifadədə və məhkəmə qərarlarını icra etməmək kimi cinayətlərdə hallanıb.

Tanınmış kinorejissor-aktyor Şeyx Əbdül Mahmudbəyov da Hacıbala Abutalıbovun qanunsuz əməlləri ilə üz-üzə qalan vətəndaşlardandır. O, “Yeni Müsavat”a açıqlamasında Hacıbala Abutalıbovu cinayətkar adlandırıb: “Ötən dəfə Hacıbala Abutalıbova səsləndim, boynunda haqqımın olduğunu dedim. Hacıbala Abutalıbov səsini çıxartmadı. Mən ona hələ mer olduğu vaxt demişəm ki, türməyə yanına mütləq gələcəyəm. Bir-iki kilo alma, mandarin alıb sənə baş çəkəcəyəm. Bunu ona görə ona dedim ki, vəzifənin əbədi olmadığını başa düşsün. Bir daha Hacıbalaya səslənirəm, sən doğrudan da kişisənsə, demişəm yenə deyirəm, gəl, elədiyin cinayətə cavab ver. Xəbərim var nakişiliyindən, mənimlə görüşəndə üzümə gülmüsən, arxamdan demisən ki, artisti qoymuşam küçələrdə. Mən küçələrdə deyiləm, amma sən mütləq türmədə olacaqsan. Gəl üzr istə, halallıq al, yoxsa ”içəri" gedəcəksən".

Şeyx Əbdül Mahmudbəyov Hacıbala Abutalıbovun həbsi üçün kifayət qədər ciddi əsasların olduğunu deyib: “Hacıbala cinayətkardır və həbs olunmalıdır! Lap tutaq ki, Hacıbalanın baş verənlərdən xəbəri olmayıb. Bu halda da günahkardır, vəzifəsinə səhlənkar yanaşıb və yenə də həbs edilməlidir. Bakı Şəhər İcra Hakimiyyətinin başçısı o olub və ”FF-2011" tikinti şirkətinə verilən sənəddəki möhürü də Hacıbala vurub. Bu işdə həbsə alınan Rasim Quliyevin günahı yoxdur. İmzanı Hacıbala ona atdırıb, amma möhürü özü vurub. Möhür Hacıbalanın özündə olub, o, möhürü əlindən heç kimə verməyib. Hacıbala Abutalıbov kimi “krot” əlindən möhür verməzdi, bunu hər kəs bilir. Bu işin başında dayanan Hacıbala Abutalıbovdur. Bugünkü strukturlar insanları qarşıdurmaya aparıblar, Hacıbala ortalıqda qala-qala sən onun müavinini niyə “içəri” qoyursan? O adamın günahı yoxdur, bütün cinayəti Hacıbala edib, 80 nəfəri küçələrdə qoyub. Bundan başqa, Hacıbala Abutalıbov 9 il Azərbaycan məhkəmələrinin qərarını icra etməyib. Azərbaycan dövləti adından çıxarılan məhkəmə qərarını icra etmədiyinə görə də həbsə alınmalıdır".

Şeyx Əbdül Mahmudbəyov baş prokuror Kamran Əliyevin adına şikayət hazırladığını da açıqlayıb: “Hacıbala Abutalıbov Azərbaycan dövləti adından çıxarılan qərarların icra olunmamasına görə istintaqa cəlb edilməli, qandallanıb türməyə yola salınmalıdır. Bu adam Azərbaycan dövlətinin gücündən istifadə edib və 80-ə yaxın Azərbaycan vətəndaşına qarşı ağır cinayət törədib. Vəzifə səlahiyyətlərindən sui-istifadə etməklə mülkiyyət hüquqlarımızı kobud şəkildə pozub. 9 il əvvəl törətdiyi bu cinayətə görə o, mütləq şəkildə cəzasını almalıdır”.

“Bakı” Hüquq Şirkətinin rəhbəri Natiq Ələsgərov “Yeni Müsavat”a deyib ki, baş vermiş cinayətlərə görə Cinayət Məcəlləsinin 308.2 (vəzifəli şəxsin səlahiyyətlərindən ağır nəticələrə səbəb olan şəkildə sui-istifadə etməsi) maddəsi ilə də cinayət işi başlanıla bilər: “Bu maddə ilə mühakimə olunan şəxslər 3 ilədək vəzifə tutma və ya müəyyən fəaliyyətlə məşğul olma hüququndan məhrum edilməklə 3 ildən 8 ilədək həbs cəzasına məhkum oluna bilərlər. Bundan başqa, onların əməllərində 313-cü (vəzifə saxtakarlığı) maddəsində nəzərdə tutulan cinayət əməli də var. Deyilənlər təsdiqini taparsa, təkcə bu maddələrlə deyil, digər maddələr üzrə də onlar məsuliyyətə cəlb edilə bilərlər. Çünki onlar digər cinayət əməlləri də törədiblər".

Hüquqşünas deyir ki, “İcra haqqında” Qanunun 82-ci maddəsində icra sənədi icra edilmədiyi halda inzibati və cinayət məsuliyyətinə cəlb olunmanın xüsusi qaydası da müəyyən olunub: ““İcra haqqında” Qanunun 82.3-cü maddəsinə uyğun olaraq icra sənədi qərəzli olaraq icra edilmədikdə, icra məmuru məhkəmə qərarını icra etməyə borclu olan şəxsin Azərbaycan Respublikasının qanunvericiliyi ilə nəzərdə tutulmuş qaydada cinayət məsuliyyətinə cəlb olunması haqqında müvafiq cinayətlərə dair işlər üzrə ibtidai istintaq aparan orqana, icra xidmətinin rəhbəri (baş icra məmuru) tərəfindən təsdiq olunan təqdimat verir. Cinayət qanunumuzda isə məhkəmənin hökmünü, qərarını, yaxud digər aktını icra etməmə ilə bağlı daha sərt cəzalar nəzərdə tutulub. Belə ki, bu cür əməllərə yol verən şəxslər 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilə, 5 min manatdan 7 min manatadək miqdarda cərimə və ya 2 ilədək müddətə islah işləri və ya 3 ildən beş ilədək müddətə azadlığın məhdudlaşdırılması və ya 3 ildən 5 ilədək müddətə azadlıqdan məhrumetmə ilə cəzalandırıla bilər".
“Yeni Müsavat”


Paylaş: