Kəlbəcərin səriştəsiz və qalmaqallı icra başçısı Azər Qocayev əsaslı səbəblər olmadan rayonun Çıraq kənd icra nümayəndəsinin müavini Xudaquliyev Elnur Əvəz oğlunu vəzifəsindən qovub. İcra başçısını buna sövq edən səbəb isə, Elnur Xudaquliyevin yardım məqsədilə doğma ata yurduna gedib qayıtması, Kəlbəcər rayonunda hərbi hissələri çörəklə təmin edən sexə zəruri avadanlıq aparması olub.

“Demokratik.Az”-ın məlumatına görə, Elnur Xudaquliyevin atasının, özünün və iş adamı Əli İbrahimovun da açıqlamalarından aydın olur ki, o, doğulub boya-başa çatdığı Kəlbəcər rayonu ərazisinə icazəli əsaslarla keçib. Lakin, icra başçısı hələlik onlara bəlli olmayan şəxsi məqsədləri və məkrli planı ilə olayı bəhanə edərək həmişə öz qüsursuz fəaliyyətilə, vətənpərvərliyi ilə seçilən bir dövlət qulluqçusunu təqib-təzyiqlərə məruz qoyaraq işsiz edib.

Əvəz Xudaquliyev ölkə başçısına növbəti müraciətində oğlunun Azər Qocayev tərəfindən əsassız olaraq işindən azad edilməsini xatırladaraq:
“Bu məsələ barədə dəfələrlə şikayətlər edirik, ancaq baxan yoxdur. Oğlumun işdən qovulması icra başçısı Azər Qocayevin şəxsi istəyi və özbaşınalığıdır. İki aydır ki, yazılan ərizə və teleqram şikayətlərimiz Prezident Administrasiyasında başçını müdafiə edənlər tərəfindən gizlədilir. Cənab prezident, siz deyirsiniz ki, PA-da əvvəlki zaman deyil, şəffaflıqdır. Amma yenə də yanınızdakılar əsas həqiqətləri sizdən gizlədirlər. Azər Qocayev qoymur ki, yazdıqlarımız sizə çata. Bir daha deyirəm ki, mənim oğlum Kəlbəcərə qanuni şəkildə gedib. Oğlum iş adamının xahişi ilə Kəlbəcərdə 6 min əsgərə çörək bişirən sexin qırılmış avadanlığını alıb aparıb. Bunu da bilən kimi Azər Qocayev polis rəisinə lazımsız göstərişlər verib, öz ərizəsini alaraq oğlumu vəzifədən azad edib. Xahişim odur ki, Azər Qocayev bircə dəfə otağından çıxıb Murovdağ aşırımını keçsin, özü Kəlbəcərə getsin. Axı, necə olur ki, sülhməramlıların müşaiyətilə Kəlbəcərin Vəng kəndində yerləşən Monastr kilsəsini ermənilər ziyarət edə bilir, cinayət sayılmır, amma mənim oğlum Kəlbəcərə gedib deyə qondarma cinayət məsuliyyətinə cəlb edilərək 200 manat cərimə olunur, hətta Azər Qocayev tərəfindən qəsdlə işindən qovulur? Mən və övladlarım həmişə dövlətçiliyimizə sadiq olmuşuq, 45 il bu dövlətə xidmət etmişəm. Azər Qocayev kimi nankor, gənc kadrları belə yollarla ləkələyən bir icra başçısı təcili cəzalandırılmalı, vəzifəsindən azad edilməlidir. Cənab prezident, sizdən xahiş edirəm ki, mənim oğlumu yenidən öz işinə bərpa edilməsinə köməklik göstərəsiniz!”-deyə öz videomüraciətində bildirib.


“Demokratik.Az” saytı məsələ ilə bağlı hazırda Kəlbəcərdə olan iş adamı Əli İbrahimovla əlaqə saxlayıb. İş adamı da saytımıza açıqlamasında faktı təsdiqləyib: “Elnur Xudaquliyevi yaxından tanıyıram, dostluq münasibətimiz var. Martın sonlarında sexin şkiflərinin remenləri (qayışları-red) sındı və iş iflic oldu. Mən də məcbur qalıb Elnurdan xahiş etdim ki, sexin avadanlığını təmir etmək üçün təcili remenlər alıb gətirsin. Etiraz etmədi, poilisdən də onun gəlməsi üçün razılıq aldım və aprelin 2-də Elnur Kəlbəcərə gəldi, remenləri mənə çatdırdı. Ancaq nədənsə elə həmin gün polislər onu özlərilə götürüb apardılar, dedilər qanunsuz keçib gəlmisən. Təəccübləndim ki, bu nə deməkdir? Elnur axı postları icazə ilə keçib, Toğanadan bura 80 km yolu da maşınla gəlib. Sonra eşitdim ki, 200 manat cərimələyiblər, ürəkləri soyumayıb, hətta işdən də çıxardıblar...”.
İş adamı Elnur Xudaquliyevə qarşı baş verənlərə, xüsusilə Kəlbəcərə gəldiyinə görə işdən qovulmasına hələ də inanmaq istəmir.

“Demokratik.Az” Elnur Xudaquliyevin özü ilə də danışa bilib. Onun sözlərinə görə, müavin işlədiyi 7 il ərzində heç bir nöqsana yol verməyib. Üzərinə düşən vəzifə öhdəliklərini və verilən tapşırıqları daim uğurla yerinə yetirib. Olaya gəlincə də;
“Aprelin 1-də gecə saatlarında razılaşmış qaydada Kəlbəcərdəki çörək sexinə avadanlıqlar alıb aparmışam. Postlardan razılıqla keçib ayın 2-də səhər saatlarında Kəlbəcərə çatıb Əli müəllimlə görüşmüşük. Getməkdə də məqsədim hərbi hissələri çörəklə təmin edən sexə yardım etmək olub və bu barədə əvvəldən polis də, Kəlbəcər İHB-də məlumatlı olub. Razılıqla bütün postları, sıldırımlı-palçıqlı yolları şəxsi NİVA markalı avtomaşınımla güclə keçib ata-baba yurduma getmişəm. Buna görə icra başçısının şəxsi göstərişilə mənə Kəlbəcər RPŞ tərəfindən İXM-nin 535-ci maddəsi (Polis işçisinin və ya hərbi qulluqçunun qanuni tələbinə qəsdən tabe olmama) üzrə inzibati protokol tərtib edilib, məhkəmə qaydasında 200 manat məbləğində cərimə tətbiq edilib. Dərhal da Azər Qocayev məni yanına çağıraraq zorla işdən çıxmağım barədə mənə ərizə yazdırıb və işimdən azad edib”.

Elnur Xudaquliyevin sözlərinə görə, Azər Qocayevin vətənpərvər dövlət qulluqçusuna qarşı niyə belə sərt qərar verməsini, “töhmət” belə vermədən onu birbaşa işindən uzaqlaşdırmasını, özünün tabeliyindəki məmura qarşı düşmən mövqe tutmasını anlaya bilmir.
“Onu da deyim ki, mən 44 günlük VƏTƏN SAVAŞInda da ordumuza maddi-mənəvi dəstək göstərmişəm, dəfələrlə döyüş bölgələrinə əsgərlərimizə sovqat aparmışam. Sonda etdiyim fədakarlıq da əsgərlərimizin çörəksiz qalmaması üçün idi, yoxsa Kəlbəcərə kef çəkməyə getməmişdim. Getdiyim barədə də hamı bilirdi, icra başçısı məni işdən qovmaqla mənə qarşı haqsızlıq edib”-deyə E.Xudaquliyev olaya bu cür aydınlıq gətirib.

İnanırıq ki, olaya icra başçısı Azər Qocayevin özünün də məntiqli bir açıqlaması olacaq.
İnanırıq ki, Kəlbəcərli dövlət qulluqçusu Elnur Xudaquliyevin icazəli şəkildə Kəlbəcərə getdikdən sonra hansı qanuni əsasla işdən qovulması Prezident Administrasiyası tərəfindən obyektiv araşdırılacaq!



Paylaş: