“Meşəyə insan gəlir” çizgi filminə yəqin ki, çoxları baxıb.
Filmin məzmunu belədir ki, insan meşədə görünən kimi, bütün heyvanlar qorxularından təşvişə düşürlər.
Heyvanlara elə gəlir ki, insan bu dəqiqə meşəni də məhv edəcək, heyvanları da kəsib yeyəcək, hər yeri yandıracaq, ağacları kəsəcək, od vuracaq və s.
Ancaq hər şey heyvanların düşündükləri kimi olmur, tam əksinə olur. İnsan meşədəki ağaclara və heyvanlara qayğı ilə yanaşır, hətta, onları yanğın təhlükəsindən xilas edir. Bunu görən heyvanlar sakitləşirlər, sevinirlər. Və meşədə həyat öz əvvəlki təbii məcrasına düşür.
Bu çizgi filmini nə üçün xatırladıq ?
Ekologiya və Təbii Sərvətlər naziri Muxtar Babayev Şəki Regional Meşə Təsərrüfatı Mərkəzinə təzə müdir təyin edib.
Təzə deyiləndə, bu adam, yəni Sərxan Əliyev köhnənin…meşə qıranıdır.
Sərxan Əliyev Qax rayonunda ETSN-nin Qax Meşə Təsərrüfatı idarəsinin müdiri vəzifəsində işləyən zaman törətdiyi saysız -hesabsız korrupsiya əməllərinə görə 2018-ci ildə vəzifəsindən azad edilmiş, hətta barəsində cinayət işi qaldırmaq istəyiblər.
Lakin 2019-cu ildə nazir Muxtar Babayev tərəfindən yenidən daha yüksək vəzifəyə, Şəki Regional Meşə Təsərrüfatı Mərkəzinə müdir təyin edilmiş və 2020-ci ildə ilkin olaraq Qax –Şəki zonasındakı sıx meşə fondunun cəmi 2200 ha ərazisinin kürünərək məhv edilməsinə icazə vermiş, hal hazırda da Baş Layısqı və Baş Göynük kənd yolları arasında yerləşən 300 ha qalın meşə zolağının da traktorlarla kürünməsinə icazə vermiş, eləcə də Oğuz-Şəki magistral yolunun sağ tərəfindəki Oraban meşə ərazisinin 650 ha sahəsini ağır texnikanın köməkliyilə kürütdürərək yerini işbazlara satmışdır.
Təsəvvür edirsiniz, söhbət 5-10 sot meşə ərazisindən getmir e, min hektarlarla meşə ərazisinin satılmasından, yüzlərlə, minlərlə ağacların məhv edilməsindən gedir.
Görəsən nazir Muxtar Babayev vəzifəsindən qovulan Sərxan Əliyevin nəyinə aşiq olmuşdu ki, ona daha böyük vəzifə verdi ?
Əlbəttə, puluna, fərasətinə, meşələri məhv etmək bacarığına və s.
Əlbəttə, Ekologiya və Təbii Sərvətlər nazirliyinin Meşələrin İnkişafı Depertamentinin Şəki Regional Meşə Təsərrüfatı Mərkəzinin müdiri Sərxan Əliyev tabeçiliyində olan Qax, Şəki və digər rayonların meşə fondu ərazilərini özbaşına olaraq işbazlara icrəyə verə bilməzdi. Çünki bu boyda cinayəti törətmək üçün mütləq nazir icazə verməli idi. Və haqqını almışdı.
Bu gün həmin zonada meşədə ağac kəsiləndə, meşədə şübhəli bitkilər aşkar olanda, meşədən qəribə qoxu gələndə hamı birağızdan deyir ki, bu Sərxanın işidir. Artıq həmin zonada “Meşəyə Sərxan gəlib..” sözləri zərb-məsələ çevrilib.
Bəli, bu özünü islahatçı hesab edən, gənc nazir Muxtar Babayevin əməllərinin xırda bir hissəsidir.
Ötən yazılarımızda qeyd etdiyimiz kimi nazir Muxtar Babayev əmisi oğlu, nazirliyin Sahələrarası Nəqliyyat və Kompleks Mexaniki Təminat İdarəsinin direktoru Fizuli Babayevlə birgə təzə biznes yaradıblar. Ağacları bir yerdən başqa yerə köçürməklə yüz minlər, milyonlar qazanırlar.
Bizə elə gəlir ki, nazir Muxtar Babayevin özünü və əmisi oğlunu başqa yerə köçürməyin vaxtı çatıb. //gundelik-baku.com//


Paylaş: