Abşeron rayonu, Xırdalan şəhəri, M.Ə.Rəsulzadə küçəsi 1260 ünvanında yerləşən "Rahat MTK"-nın inşa etdiyi 12 mərtəbəli yaşayış binasının təsisçilərinin etdikləri qanunsuzluqlar barəsində AzFakt.com ötən ay oxuculara məlumat vermişdi.

Rəqəmlərə, faktlara söykənən həmin məlumatlarda göstərilənlərə bağlı indiyə qədər heç bir tədbir görülməyib. Buradan belə qənaətə gəlmək olar ki, "Rahat MTK"-nın təsisçilərinin həm vergi xidməti orqanlarında, həm də Abşeron rayon İcra Hakimiyyətində güclü himayədarları var. Çünki vergi orqanlarına həm ərizə ilə, həm də mətbuat vasitəsilə qanunazidd hərəkətlərindən şikayət verilib. Zəbt olunmuş torpaqlar barədə isə Abşeron rayon İcra Hakimiyyətinə rəsmi ərizə ilə müraciət olunub.

12.02.2021-ci il tarixdə Abşeron rayon Memarlıq və Tikinti şöbəsinin müdiri vəzifəsini müvəqqəti icra edən böyük məsləhətçi Şahin Bayramovun cavabı bu olub: “Qaldırdığınız məsələ rayon İcra Hakimiyyətinin səlahiyyətləri xaricində olduğu üçün hüquq-mühafizə orqanlarına müraciət etməyinizi tövsiyə edirik”.

Amma Şahin Bayramov unudur ki, bu birbaşa İcra Hakimiyyətinin səlahiyyətində olan məsələdir. Əlbəttə ki, şirkət rəhbərləri himayədarlara arxayın olmasaydı, həm binada satışa yararlı sahəni vergidən gizlətməz, həm də ərazi zəbt etməzdilər...

22 fevral 2017-ci il tarixdə "Rahat MTK"ya sədr seçilən Ələddin Məmmədhəsənov bir ideya üzərində dayanır: Binanın sakinlərindən daha çox qazancı necə əldə etmək olar? Binaya gələndə gödəkçəsinin qoltuq cibində pendir dürməyi gətirib nahar edən bu şəxsin indi sorağı bahalı restoranlardan gəlir. Bina təhvil verilmədiyindən sakinlər işıq və suya görə sərf etdikləri kommunal borcu nağd şəkildə Ələddin Məmmədhəsənova verirlər. Sədr isə həmin pulları öz şəxsi ehtiyaclarına sərf edir. MTK-nın suya və işığa olan borcu isə külli-miqdardadır.02 avqust 2021-ci il tarixdə suya olan borc 69.564 manat, işığa olan borc isə 39.564 manat - ümumilikdə 112.584 manat təşkil edir.

Kooperativin sədri kimə və nəyə arxayın olub belə fırıldaqçılığa əl atır?

"Azərişıq"-ın Xırdalan Enerji Təchizatı və Satışı İdarəsinin rəisi Şahin Qədimli və Abşeron Su Kanal İdarəsinin rəisi Rövşən Əliyev niyə bu işlərə göz yumur? Hər ay hər bir obyekt və bina barəsində həmin rəislərə hesabat verilir. Bu rəislər nəyin və kimin hesabına imkan verirlər ki, bu qədər borc yığılsın? Yəqin ki, Ələddin Məmmədhəsənov da bu şəxslərə arxayın olub, pulları hesaba köçürmədən şəxsi ehtiyaclarına sərf etməyi üstün bilir. Amma bu şəxs sabah işdən çıxsa, borclar kimdən tələb olunacaq?

Ərazidə olarkən şahidi olduq ki, 28 % pay sahibi olan Rasim Həsənov da binaya 5 ədəd yük liftini quraşdırmadan gedib. Hazırda isə başqa bir yerdə bina inşa edir. Yenə sakinlər əzab çəkir. Kimlərəsə arxayın olan MTK sədri 1-ci blokda zirzəmiyə giriş pilləkəninin yerini kiçildib və artıq qalan sahəni isə Zamin adlı şəxsə 20.000 manata satıb. Pilləkənin layihədə tutulan sahəsi 24 kv.m. olmasına baxmayaraq, indi həmin sahə cəmi 6 kv.m. təşkil edir. Bu barədə dəfələrlə Fövqəladə Hallar Nazirliyinin qaynar xəttinə xəbər verilsə də, heç bir tədbir görülməyib.

Sakinklərin dediyinə görə, Ələddin Məmmədhəsənov ona heç kimin heç nə edə bilməyəcəyini, "gələnlər"in də pullarını verib yola saldığını deyirmiş:

"Biz FHN işçilərinin bu qanunazidd hərəkətlərini başa düşə bilmirik. Ələddin Məmmədhəsənov bütün bunlarla qane olmur, indi də zirzəmiyə "əl gəzdirir". Layihədən kənar zirzəmidən çölə pilləkən, pəncərələr açır və həmin obyektləri ayrı-ayrı vətəndaşlara satır. Binanın zirzəmi hissəsində 1 kv.m-də boş sahə qalmayıb. Zirzəminin satışa yararlı sahəsi 1600 kv.m-dən çox olmasına baxmayaraq, həmin yeri vergiyə 540 kv.m kimi göstəriblər. Bəs satılan əlavə 1100 kv.m. yer haradan çıxdı? Yəqin ki, bu işə vergi xidmətinin işçiləri şəxsən özləri nəzarət edəcəklər.2019-cu ildə "Azərişıq" binaya cərimə yazıb. Bu da bizim borcumuzun üstünə gəlib. Əgər binanın sədri Ələddin Məmmədhəsənov ümumi sayğaca maqnit qoyub işığın verilməsinə müdaxilə edirsə, bu bizim günahımız deyil. "Azərişıq"ın mütəxəssisləri binanı bu müdaxiləyə görə 4000 manat cərimə edib. Sədr yığılan pulları cibinə qoyursa, işığa müdaxilə edirsə, layihədə nəzərdə tutulmayan işləri görürsə, əmək haqqına görə vergiyə pul ödəmirsə, biz niyə əziyyət çəkməliyik? Biz sakinlərin ödədiyi pulların hesabına Abşeron rayon Məhəmmədi qəsəbəsində özünə dəyəri 100.000 min manatdan yuxarı olan ev tikdirirsə, salondan qiyməti 35.000 min manat olan "Hyundai" markalı avtomobil alırsa, bizim günahımız nədir? Biz öhdəmizə düşən borcları vaxtı-vaxtında ödəyirik. Niyə bu şəxs fikirləşmir ki, bu işlərin sonu yoxdur? Hərəkətlərinə görə hüquq-mühafizə orqanlarına cavab verməli olacağını düşünmür? Ümid edirik ki, hüquq-mühafizə orqanları Azərbaycan Respublikasının Cinayət Məcəlləsinin 179.2.3, 179.3.2 və 308.1-ci maddələrinin tələblərini bu şəxsə başa salıb, qətimkan tədbiri seçəcəklər. Üzümüzü aşağıda qeyd olunan qurumlara tutub, xahiş edirik:

1. Abşeron rayon İcra Hakimiyyətindən
2. Baş Prokurorluq yanında Korrupsiyaya qarşı Mübarizə Baş İdarəsi
3. İqtisadiyyat Nazirliyi yanında Dövlət Vergi Xidməti İdarəsi
4. Abşeron Su kanalları İdarəsi
5. Azərişıq Xırdalan Enerji Təchizatı və Satışı İdarəsi

Bizi bu bəladan xilas edin.

Qeyd edək ki, "Rahat" MTK-ya Dövlət Vergi Xidmətində çalışan yüksək vəzifə tutan bir məmurun himayədarlıq etdiyi iddia edilir. Həmin məmurun kimliyi barədə məlumatları dəqiqləşdirib oxucularımıza çatdıracağıq.

Araşdırmamız davam edir...


Paylaş: