İmişli rayon mərkəzi bazarında 3 ay əvvəl əmlakı yanaraq məhv olan 204 sahibkar məmur qapılarında qalıb.

Ticarətçilərdən biri "AzPolitika.info"-ya bildirib ki, yanğın zamanı külli miqdarda zərərə düşüblər, amma onların nə dərdinə şərik olan var, nə də kompensasiya ödəyən. İcra hakimiyyəti və bazar rəhbərliyi onların şikayətinə baxmır.

Sahibkarlar dünən İmişli rayon İcra Hakimiyyətinin qarşısında aksiya keçirərək şikayətlərinə baxılmamasına etirazlarını bildiriblər. "Qapılarda qalmışıq, gəlirik, deyirlər, icra başçısı yoxdur, bizi qəbul etmirlər, şikayətimizi dinləmirlər. Biz cənab Prezidentdən, Mehriban xanımdan xahiş edirik, şikayətimizə baxsınlar", - deyə sahibkarlardan biri deyib.

Şikayətçilər qəbul otağında xeyli gözlədikdən sonra etirazlarını şəhərin əsas prospektlərindən birini bağlamaqla davam etdiriblər. Nəticədə yolda tıxac yaranıb.

Xatırladaq ki, hadisə bu ilin may ayının 25-də baş verib. Nəticədə yüzlərlə sahibkara külli miqdarda ziyan dəyib, ticarət mərkəzinin bir hissəsi xarabazara çevrilib. Yanğın Fövqəladə Hallar Nazirliyinin (FHN) Dövlət Yanğından Mühafizə Xidmətinin İmişli Rayon Yanğından Mühafizə Hissəsinin qüvvələri, Şirvan, Beyləqan, Cəbrayıl, Ağcabədi, Sabirabad, Biləsuvar, Kürdəmir və Saatlı rayonlarının Yanğından Mühafizə hissələrindən əlavə qüvvələr cəlb olunduqdan sonra söndürülüb.

“Yanğın nəticəsində ümumi sahəsi 20 000 kv.m. olan bazarda, təqribən 2 400 kv.m. sahədə bir dam altında yerləşən və bir-birinə bitişik 150 müxtəlif təyinatlı mağazanın yanar konstruksiyaları və içərisinə yığılmış mallar yanıb. Bitişik digər mağazalar və bazarın qalan hissəsi yanğından mühafizə olunub”, - deyə Nazirliyin açıqlamasında qeyd olunub.

Sahibkarlar isə yanğının qəsdən törədildiyini ehtimal edirlər. Onlardan biri "AzPolitika.info"-ya deyib ki, anidən baş vermiş yanğının qısa zaman kəsiyində bütün obyektləri əhatə etməsi, həm də, elektrik enerjisinin normadan artıq gərginliklə ötürülməsi ehtimalını ortaya qoymuş olur ki, bunun səbəbi müəmmalıdır.





Paylaş: