Paytaxtın Xətai rayon ərazisində yerli icra hakimiyyəti tərəfindən səkilərin, yaşıllıqların ərazisinin satılması keçmiş başçı Razim Məmmədovdan sonra da davam edir. Xətai İH başçısı Rafiq Quliyev bu özbaşınalıqlara son qoyulması əvəzinə rayonda səkilərin, yaşıllıqların zəbt olunmasına göz yumur. Bu qanunsuzluqda Dövlət Şəhərsalma və Arxitektura Komitəsi də dəstəyini əsirgəmir. Hər iki struktur birləşərək Xətainin altını üstünə çevirməkdədir. Bu dəfə parkın içinə, yaşıllıqları bir restoran tikintisinə qurban veriblər. Belə desək, yaxın dövrdə Xətaidə əhalinin istirahəti, gəzməyə park yeri olmayacaq.





Reportyor.info-nun təqdim edəcəyi foto faktdan da görünür ki, metronun “Əhmədli” stansiyasına yaxın ərazidə ağaclar məhv edilib, obyektlər tikilib, səkilər işğal olunub, bəzi yaşıllıqlar isə mağazaların arasında sıxılıb qalıb, boy ata bilmir. Kadrdan görünür ki, iş adamları Xətai İH-lə dil taparaq bu yerlərdə obyekt tikilməsini davam etdirirlər. Əfsus ki, icra başçısı Rafiq Quliyev Xətai rayonunda köhnə əyyamı yaşadır, bu da problemləri getdikcə dərinləşdirir. Eyni zamanda Şəhərsalma Komitəsi xəlvətcə bu qanunsuz tikintilərə sərəncam verir. Görünür, korrupsiya faktları ilə məmurların həbsi həmkarlarına ibrət dərsi olmur. Prezident dəfələrlə xəbərdarlıq edib ki, məmurlar qanunsuzluğa yol verəcəksə, bağışlanmayacaq. Bakının böyük rayonlarından olan Xətaidə isə bu illər ərzində bir qarış da yer qoymayıblar. Həm sabiq, həm indiki başçı rayonu satışa çıxarıb, küçələr, səkilər, yaşıllıqlar peşkəş olunub. Faktla bağlı Ekologiya və Təbii Sərvətlər Nazirliyi tərəfindən əraziyə baxış keçiriləcək. Bu barədə saytımıza bildirilib. Qeyd olunub ki, hər hansı ağac kəsimi aşkarlansa, müvafiq qaydada tədbir görüləcək.





Paylaş: