Adətən, hər bir işçi çalışdığı idarə və ya təşkilata əməli işi ilə hörmət gətirməlidir! Əksini edirsə, bu artıq məsuliyyətsizlikdir, daşıdığı vəzifəyə hörmətsizlikdir! Sözümüzün mahiyyəti və mənası budur ki, indi TƏBİB-də Departament rəhbəri olan Nurlan Quliyev də eyni ssenarini işə salıb. “KAZA GROUP” MMC-nin direktoru İntiqam Məmmədovun İcbari Tibbi Sığorta üzrə Dövlət Agentliyinin sədri Zaur Əliyevə (surəti “Təzadlar” qzetinə və saytına) müraciətlə yazılmış məktubdan məlum olur ki, Quliyev Nurlan Rauf oğlu TƏBİB-də tutduğu vəzifəsinədək “İDESK” MMC-nin direktoru olub. Və o, öz möhür və imzası ilə təsdiqlənən müqavilə bağlayaraq “KAZA GROUP” MMC-dən müxtəlif növ ərzaq məhsulları alıb... “KAZA GROUP” MMC-yə (eləcə də digər tanınmış şirkətlərə) borcu yaranandan sonra fürsəti əldən verməyərək rəhbəri olduğu MMC-nin rəhbərliyindən çıxıb, həm də borcunu verməmək üçün aradan çıxıb… Əslində isə, bununla da özünə və TƏBİB-ə problemlər yaradıb. İş məhkəmə müstəvisinə çıxıb. Belə ki, “KAZA GROUP” MMC-nin direktoru İntiqam Məmmədov “İDESK” MMC-nin direktoru Nurlan Quliyevi məhkəməyə verib. Bakı Kommersiya Məhkəməsi də onun xeyrinə qərar çıxardıb. Qərara əsasən, Nurlan Quliyev iddiaçıya 15 min 155 manat pul ödəməlidir. N.Quliyev isə dirəniş göstərir, qanunu saymır, həm də indi departament direktoru olduğu TƏBİB-i və TƏBİB-in tabe olduğu İcbari Tibbi Sığorta üzrə Dövlət Agentliyini. Təsəvvür edirsinizmi, N.Quliyev indi məhkəmə qərarını yerinə yetirməkdən imtina edir, hətta bəzi yerlərdə onun arxasında Zur Əliyevin dayandığını, ona heç kimin bata bilməyəcəyini deyir. Özü də çəkinmədən deyir. Bunu həm də onun tutduğu mövqeyi də təsdiqləyir. Deməli, kiməsə arxayındır??? «Mən artıq cavabdeh MMC-nin rəhbəri deyiləm, TƏBİB-də məsul vəzifə daşıyıram» və s. kimi iddialarda olan N.Quliyevin bu hərəkətinə nə ad verəsən?

Təsəvvür edirsinizmi, Nurlan Quliyev TƏBİB-in adı ilə alver etmək həvəsinə düşüb. Belə ki, İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyevin əmri ilə bu ilin sentyabrın 13-də “Tibbi Ərazi Bölmələrini İdarəetmə Birliyi” publik hüquqi şəxsin TƏBİB-in İdarə Heyətinin sədri vəzifəsi Vüqar Cavanşir oğlu Qurbanova verilib. Doğrudanmı Nurlan Quliyevin məqsədi TƏBİB-in imicinə və ünvanına problemlər yükləmək, qalmaqallarda adını hallandırmaqdır? Axı borc sahibləri məcbur olub borclunu, yəni Nurlan Quliyevi TƏBİB-də axtarmalı olacaq. Təsəvvür edirsinizmi, TƏBİB-in qapısı az qala hər gün məhkəmə icraçıları və borc sahibləri tərəfindən döyülür. Bu vəziyyət kimə lazımdır??? Ən maraqlısı budur ki, Nurlan Quliyevin rəhbəri olduğu MMC-nin “KAZA GROUP” MMC-yə cəmi 15 min 155 manat borcu var. Belə bir kiçik məbləğə görə o boyda TƏBİB-in adına xələl gətirməyə dəyərmi???

Nurlan Quliyev sorğuya cavab vermək istəmirsə…

Onu da deyək ki, «KİV haqqında» Qanunun tələblərinə uyğun olaraq redaksiya tərəfindən şikayətçinin Prezident İlham Əliyevə ünvanlı müraciəti barədə məlumatı əvvəlcədən həm İcbari Tibbi Sığorta üzrə Dövlət Agentliyi İdarə Heyətinin sədri Zaur Əliyevin, həm də “Tibbi Ərazi Bölmələrini İdarəetmə Birliyi” publik hüquqi şəxsin İdarə Heyətinin sədri vəzifəsini icra edən Vüqar Qurbanovun, eləcə də TƏBİB-in barəsində şikayət olunan Departament rəhbəri Nurlan Quliyevin və digər vəzifəli şəxslərin elektron poçtuna informasiya sorğusu formasında göndərilib. Lakin bu gün aldığımız məlumata görə, Nurlan Quliyevin vəkili və digər məsul şəxslər iddiaçı “KAZA GROUP” MMC-nin rəhbəri ilə danışıqlara başlayıblar. Lakin bu danışıqlardan narazı qalan iddiaçı tərəf məhkəmə qərarının dərhal icrasını tələb edir.

Redaksiya ilə əlaqə saxlanılmadığından biz “KAZA GROUP” MMC-nin rəhbərliyinin İcbari Tibbi Sığorta üzrə Dövlət Agentliyi İdarə Heyətinin sədri Zaur Əliyevə müraciətini təqdim etməli olduq:

- Çox hörmətli Zaur müəllim!

Biz iş adamı olaraq cənab Prezidentin sahibkarlığın inkişafı üçün imzaladığı sərəncam və fərmanlara güvənərək fəaliyyətimizi qururuq. Belə ki, “KAZA GROUP” MMC yarandığı gündən respublika ərazisində fəaliyyət göstərən otel və istirahət mərkəzlərini qida və digər məhsullarla təmin etməklə məşğuldur. Belə MMC-lərdən biri «İDESK» MMC-dir. Adı çəkilən MMC ilə 01 avqust 2019-cu il tarixdə 54 saylı «Tədarük» müqaviləsi bağlamışıq. Müqaviləyə əsasən biz satıcı olaraq alıcı «İDESK» MMC-yə qida və qeyri-qida məhsulları satmışıq, alıcı isə təhvil verilmiş məhsulların dəyərini bizə ödəmişdir. Həmin müqaviləyə görə, biz onlara məhsulları elektron qaimə ilə çatdırırıq, alıcı isə 45 gün ərzində bizə köçürmə yolu ilə həmin məhsulların dəyərini ödəyir. Biz müqavilə bağlanıldıqdan 17 dekabr 2019-cu ilədək «İDESK» MMC-yə 22 min 45 manat 75 qəpik dəyərində məhsul təhvil vermişik. Qeyd edirik ki, biz bu məhsullara görə dövlət büdcəsinə 3 min 303 manat 04 qəpik ƏDV də ödəmişik. Lakin çox təəssüflər olsun, «İDESK» MMC bizə indiyədək cəmi 8 min 853 manat 17 qəpik ödəmiş, bizə 13 min 191 manat 83 qəpik borclu qalmışdır, ödəməkdən imtina edir. Eləcə də borclunun bizə ƏDV-yə görə 1962 manat 57 qəpik borcu qalmışdır. Beləliklə, «İDESK» MMC bizə ƏDV ilə birlikdə 15 min 155 manat 15 qəpik borcludur.

Hörmətli Zaur müəllim!

Bizi narahat edən həm də budur ki, «İDESK» MMC-nin direktoru Nurlan Rauf oğlu Quliyev bir müddətdir TƏBİB-də məsul vəzifəyə təyinat alıb. İndi o, bu vəzifəsindən sui-istifadə edərək bizə olan borcunu ödəmək istəmir. O, hesab edir ki, belə bir nüfuzlu qurumda məsul vəzifə tutursa, deməli, toxunulmazlıq statusu vardır. Ona görə də bizə qarşı saymazlıq edir, TƏBİB kimi nüfuzlu qurumun adına hörmət gətirmək əvəzinə, əksinə, problemlər yaradır, mənfi imic formalaşdırır. Biz bunu rəhbəri olduğumuz MMC-yə qarşı təhdid və təzyiq kimi qəbul edirik. Bu şəxs başa düşmək istəmir ki, əvvəla, ortada dövlətimizin adından çıxarılmış məhkəmə qərarı vardır və birmənalı olaraq icra edilməlidir. İkincisi, TƏBİB-də tutduğu vəzifəsindən başqalarına qarşı təhdid və təzyiq vasitəsi kimi deyil, əksinə, təmsil olunduğu qurumun adına hörmət gətirmək üçün istifadə etməlidir. O, açıq şəkildə Sizə güvəndiyini də gizlətmir…

Bildiririk ki, Cənab Prezident biz sahibkarların həmişə dayağı olmuşdur, ölkəmizdə sahibkarlığın inkişafına daim dəstək verməkdədir, sahibkarların işinə mane olanlara sərt münasibətini ifadə etmişdir. Adı çəkilən Nurlan Quliyev isə bizim bütün işimizi pozmuş, dövlət büdcəsi qarşısında öhdəliklərimizin yerinə yetirilməsinə ciddi şəkildə maneçilik törətməkdədir. Ona görə də Sizdən xahiş edirik, tabeliyinizdə çalışan, Sizə arxalandığını bildirən, bunu hərəkətlərində də gizlətməyən Departament rəhbəri Nurlan Rauf oğlu Quliyevin üzərinə düşən öhdəliyini yerinə yetirməsi üçün ona təsir göstərəsiniz.

Dərin hörmətlə:

İntiqam Məmmədov,

«KAZA GROUP» MMC-nin direktoru

(Davamı var)

“Təzadlar”ın Araşdırma Qrupu



Paylaş: