Qazaxda axır vaxtlar narazılıqlar, şikayətlər baş alıb gedir. Seminariya tikintisi ətrafinda olan problemlər bitib tükənmir. Bir tərəfdən də ADA universitetinin tikintisinin söhbəti aləmi qarışdırıb. Bilmirsən Qazaxda seminariya tikilir yoxsa ADA universiteti ? Hamını maraq götürüb ki, ADA Universiteti tikmək üçün nə qədər ərazi lazımdır ki, bu ADA universiteti Qazaxa sığmır ? Həqiqətənmi bu universitet elə Qazaxın yarısı boyda olacaq? Çünki Universitetin tikilməsi üçün bir küçənin sakinlərinin qarşısına evlərindən çıxmaq tələbi qoyulub. Özü də tikinti şirkətinin qoyduğu qiymət və tələblərlə razılaşmaqla. Qazaxda hara gedirsən seminariyayla ADA Universitetinin söhbəti gedir. Tikintiyə rəhbərlik edən Məmməd Musayev isə sən demə qazaxlıymış. Həm də , bizim Məmməd müəllim xeyriyyəçiymiş. Soruşduq axtardıq Qazaxda onun bir xeyriyyə işinin tapa bilmədik. Xeyriyyəçilik yalnız seminariya, universitet , bank tikməkdənmi ibarətdir ? Ötən il dünyanı cənginə alan koronavirus xəstəliyi həyatı büsbütün iflic etdiyi bir zamanda həmyerlimiz xeyriyyəçi Məmməd Musayev niyə sahibkarı olduğu bankların işçilərindən undan, çaydan, qəntdən göndərmədi həmyerlilərinə? O tükənməz sərvətindən niyə səxavət göstərmədi ? Yaxşı, xeyri, köməyi dəyməyən doğma rayonuna niyə ziyan vurur axı Məmməd müəllim. Qazaxa gələndə əhali arasına çıxıb dərdləri, problemləri, dolanışıqları ilə niyə maraqlanmır? . Ətrafına topladığı adamları qazaxlıların üstünə niyə göndərir?. Evlərini almaq istədiyin adamların qapısına niyə özü getmir?. “Mənim prezidentlə şəklim var, prezident məni şəxsən tanıyır, bütün işləri yuxarılarla, böyüklərə danışıb həll edirəm deyib böyük – böyük danışır. Məmməd müəllim doğrudanmı qazaxlıları yaxşı tanımır ? Bu aşağı təbəqə hesab etdiyi insanlar böyük yox, danışanda ağır danışacaqlarını bilmirmi?. Düzdür M. Musayev bütün imkanalarından istifadə edib hər işi, bütün layihələrini həyata keçirə bilər. Oğlunu bu günlərdə Dövlət Məşğulluq Xidmətinə yüksət vəzifəyə qoyduğu kimi. Bu vəzifə Fuad Musayevə hansı xidmətlərinə görə verilib bilmirik. Bəlkə 44 günlük Vətən müharibəsində iştirak etdiyinə, göstərdiyi qəhramanlığa görə ? M. Musayev nə qədər geniş imkanlara sahib olsa da insanların haqlarını tapdalaya bilməz.

M. Musayev bələ xeyriyyəçidirsə ADA universiteti tikmək istədiyi küçədən bir küçə yuxarı gəlsin. Burada biz bir necə ailəyik. Neçə illərdir ev demək olarsa bu umumi yaşayış evlərində yaşayırıq. Gözümüz yolda qalıb ki, bir xeyriyyəçi qapını döyüb -“sizi yeni binaya köçürürük”- deyəcək. Şəhərin mərkəzində şəhər icra nümayəndəliyinin binasının arxasında yerləşən bu evlər qəza vəziyyətindədir. Bu evlərdə yaşayanlar ailə başçısını itirmiş qadınlardır. ADA universitetini M. Musayev burada inşa etdirsin. Xeyriyyəçiliyini göstərsin. Yoxsa gedib insanların hər cür şəraiti olan evlərini uçurtmasın. Evimizin yanında köhnə məhkəmə binası, uşaq baxçası var. Illərdir baxımsız vəziyyətdədir. Elə bura da bizim evlərin gözünə qatılsa möhtəşəm bir ADA universiteti inşa olunar. Bilirik ki, M. Musayev ətraf evləri satın almaq üçün bütün vasitələrdən istifadə edir. Sona xanımın evini almaq üçün həbsdə olan qızı İradənin yanına maklerləri göndərmək üçün xeyli xərcin çıxdığını da yaxşı bilirik. Çünki İradənin razılığını almaq üçün maklerlər onun yanına Bakıya dəfələrlə ayaq döyüblər. İradə razılıq vermirdi ki, atamın evinin satılmasına razı deyiləm. Dəmir barmaqlıqlar arasında , əli daş altda qalan İradəni hədələyərək razılığını aldıqları da məlumdur. Evlərdən birinin sahibi də Maya xanımdı. Evin satılması üçün oğlanlarından birinə yüksək vəzifə vəd olunaraq razılıq ərizəsi alinib, digər oğlu isə evin satılmasına razılıq vermir. Tikinti işçiləri 5 000 min manat ilkin ödəniş verib ailəni özlərindən aslı vəziyyətə salib. Ana oğul arasında düşmənçilik yaranıb. Xeyriyyəçi M. Musayevin nə çox “xeyrini “ Qazaxda maklerlər və tikinti nəzarətçiləri görür. Çünki kiminsə qapısında dayanıb öz niyyətini həyata keçirmək üçün müxtəlif hiylələr, yollar axtarmaq asan iş deyil. M. Musayev ADA universiteti tikmək üçün niyə məhz o küçəni seçib bilmirik. Qazaxda universitet tikmək üçün çox yerlər var. Şəhərin ən gözəl yerində mərkəzi küçədə rayon prokurorluğunun yanında yerləşən Avey dövlət mədəniyyət qoruğunun binası da əsl universitet yeridir. Heydər Əliyev prospektində yerləşən Avey mədəniyyət qoruğunun binasının adını yararsız qoyub özəlləşdiriblər. Bura hansı dövlət məmuruna aid olduğunu da bilirik. Bundan başqa məhkəmə binasi ilə üz –üzə yerləşən köhnə baxça binası da hasara alınıb. Uzun müddətdir ki, olduğu kimi durur. Buranı özəlləşdirmək üçün kimin tərəfindən icazə verildiyi də məlumdur. Yaxşısı budur qoyun qazan üstüörtülü qaynasın.

Xeyriyyəçi sözü, xeyriyyəçi adı hörmətdən düşüb desək yanılmarıq. Xeyriyyəçi bir işi icra etmək istəyəndə qarşı tərəfin önünə şərt qoyub iş görürsə bunun adı xeyriyyəçilik olmur axı. Keçmişə nəzər salanda görürük ki, xeyriyyəçilər kiminsə evini əlindən alib yerində nə məktəb, nə məsçid, nə də fabrik tikməyib. Hansı xeyriyyəçilikdən danışaq ki, onun bariz nümunəsi, əsl xeyriyyəçi simasını görmürük. Hökmən xeyriyyəçinin işinin arxasında şəxsi mənafey durur. Qazaxlıların isə xeyriyyəçi sarıdan heç bəxti gətirmədi ki, gətirmədi.

Günay Seyidova. Müstəqil yazar.