Oktyabrın 26-da Azərbaycan Yazıçılar Birliyinin (AYB) 13-cü qurultayı keçirilib. Qurultayın yekununda Xalq yazıçısı Anar növbəti dəfə AYB sədri postuna seçilib. Elə həmin gün jurnalist AYB-nin birinci katibi Çingiz Abdullayevə qurultayın təşkili üçün ayırılan 203 min manatın hara xərcləndiyi barədə sual verib. Xalq yazıçısı bu sualdan hirslənərək, jurnalistə "utanıb ölmürsən, bunu soruşursan?”, - deyə reaksiya verib.

Bundan sonra sosial şəbəkələrdə çox sayda istifadəçi Ç.Abdullayev barəsində "utanın!" çağırışı ilə statuslar yazıb, müzakirələr açıb və yazıçı sərt tənqidlərə məruz qalıb. Mətbuat da bu tənqidləri tirajlayıb.

Müzakirələr fonunda bəzi millət vəkilləri, ziyalılar, hətta AYB-nin bir çox üzvləri Ç.Abdullayevi qınayaraq, onun səsləndirdiyi fikirlərin qəbuledilməz olduğunu bildiriblər. Lakin bəzi tanınmış simalar var ki, hələ də bu olaya münasibət bildirməkdən çəkinirlər.

Təəccüb doğursa da, onlardan biri hər zaman tənqidi fikirləri ilə diqqətçəkən Xalq şairi Vahid Əzizdir. O, sonuncu qurultayda çıxış edərək Azərbaycan Yazıçılar Birliyinə səlahiyyət verilməsi təklif edilib. Bildirib ki, Azərbaycan Yazıçılar Birliyi həm də yazıçı və şairlərin nazirliyidir: "Bu cür sərəncamlarda iş icrası üçün birliyə də səlahiyyət verilməlidir".

Hamının sevgi və hörmətlə yanaşdığı Vahid Əziz AYB ətrafında hələ də səngiməyən müzakirələrdən niyə kənarda qalıb? Bəlkə o, Ç.Abdullayevi müdafiə edir?

Modern.az-ın əməkdaşı bu suala cavab tapmaq üçün Xalq şairinin özü ilə əlaqə saxlayıb.

"Artıq Yazıçılar Birliyi və qurultay haqqında heç nə danışmaq istəmirəm", - deyən Vahid Əziz buna səbəb kimi qələm əhlini günahkar hesab edir.

"Jurnalistlər məndən söz alıb, onu başqa formada yazırlar. Demədiyim fikirləri tirajlayıb, haqqımda xoşagəlməz müzakirələr açırlar. Ona görə də mən danışmaq istəmirəm. Yazıçılar Birliyi ilə bağlı sualı mənə yox, rəhbərliyə verin", - deyə Vahid Əziz vurğulayıb.