Krımın Cankoy şəhərində Rusiyanın dəmir yolu ilə daşıdığı “Kalibr NK” qanadlı raketləri məhv edilib.
Bu barədə Ukrayna Müdafiə Nazirliyinin Baş Kəşfiyyat İdarəsi məlumat yayıb.

"Müvəqqəti olaraq işğal olunmuş Krımın şimalındakı Cankoy şəhərində Rusiyanın "Kalibr NK" qanadlı raketləri dəmir yolu ilə daşınarkən məhv edilib”, - məlumatda deyilir.

Kəşfiyyat rəsmiləri xatırladıblar ki, söhbət Rusiya Qara Dəniz Donanmasının yerüstü gəmilərindən buraxılış üçün nəzərdə tutulan raketlərdən gedir. Belə silahların məhvetmə məsafəsi yer hədəfləri üçün 2500, dəniz hədəfləri üçün isə 375 kilometrdən çoxdur.

Qeyd edək ki, ötən gecə Cankoy şəhərində partlayış və atışma səsləri eşidilib. Yerli sakinlər bildiriblər ki, şəhərin bir hissəsində elektrik enerjisi kəsilib.

Sosial  şəbəkələrdə pulemyot və partlayış səslərinin eşidildiyi çoxlu videolar yayılıb.