“Vaqner” özəl hərbi şirkətinin sahibi Yevgeni Priqojin Ukraynanın Baxmut şəhəri uğrunda gedən döyüşlərdə öldürülümüş “Vaqner” döyüşçülərinin meyitləri önündə dayanaraq müdafiə naziri Sergey Şoyqu və baş qərargah rəisi Valeri Gerasimova müraciət edib.

O, sursat tələb edib, həmçinin Şoyqu və Gerasimovu nalayiq sözlərlə təhqir edib.

“Bu oğlanlar “Vaqner”in bu gün həlak olan döyüşçüləridir. Mənə qulaq asın. Bunlar kiminsə ataları və oğullarıdır. Bizə silah-sursat verməyənlər cəhənnəmdə yanacaqlar. Bizdə 70% silah sursat çatışmazlığı var. Şoyqu, Gerasimov, hardadır silah-sursatlar?! Siz hamınız bahalı klublarda oturmusunuz. Sizin uşaqlarınız “Youtube”a videolar çəkirlər. Bu həyatın sahibi olduğunuzu və bu ölən döyüşçülərin həyatlarını idarə edə bildiyinizi düşünürsünüz. Düşünürsünüz ki, silah sursat anbarlarınız varsa, buna ixtiyarınız da var. Elementar hesablama normaları var. Silah-sursat normalarını versəniz, onlar (əli ilə meyitləri göstərir) 5 dəfə daha azdırlar. Onlar bura könüllü olaraq gəliblər. Və sizin kabinetlərinizdə yaxşı həyat yaşamağınız üçün ölüblər”, - Priqojin bildirib.

Sözgedən kadrlar sosial şəbəkələrdə yayılıb.

Qeyd edək ki, bir neçə aydır Ukraynanın kiçik sənaye şəhəri olan Baxmutda “Vaqner” və Ukrayna ordusu arasında şiddətli döyüşlər gedir. Bir müddət əvvəl “Vaqner” PMC məlumat yayaraq şəhəri nəzarətə götürdüklərini bəyan etsələr də, Ukrayna və müstəqil mənbələr bu məlumatı yalanlayıb. Davam edən şiddətli döyüşlərdə hər iki tərəfdən yüzlərlə insanın dünyasını dəyişdiyi bildirilir.

Baxmutda isə demək olar ki, hər yer dağılıb.

Ölkənin şərqində yerləşən şəhər, həm də səkkiz aydan çoxdur Rusiya qüvvələrinin raket zərbələri altındadır.

Şəhər merinin müavini Oleksandr Marçenkonun mart ayında verdiyi açıqlamaya görə, burada cəmi bir neçə min mülki əhali qalıb ki, onlar da su, qaz və elektrik enerjisi olmadan yeraltı sığınacaqlarda yaşamağa məcbur qalıblar.