Millət vəkili İqbal Məmmədova məxsus olan “Kaspi Yıldız” Azərbaycan-Türkiyə Müştərək Müəssisəsi (VÖEN- 1600019501) uzun illərdir dövlət büdcəsinə olan böyük həcmdə vergi borcunu ödəmir.

Açıqlanan sonuncu rəsmi məlumatlarda qeyd edilir ki, hazırda (11.07.2023) millət vəkilinə məxsus şirkətin dövlət büdcəsinə 9 milyon 390 min 752 manat 64 qəpik vergi borcu var.

Qeyd edək ki, ötən ilin yanvar ayında “Kaspi Yıldız” Azərbaycan-Türkiyə Müştərək Müəssisəsinin Türkiyə vətəndaşı olan təsisçisi Rafet Ekmekçioğlu özünə məxsus 50% payı İqbal Məmmədova verib. Nəticədə “Kaspi Yıldız” Azərbaycan-Türkiyə Müştərək Müəssisəsinin təsisçisi 100% pay ilə İqbal Məmmədov olub.

Onu da bildirək ki, İqbal Məmmədova bağlılığı olan digər şirkətlərin də dövlət büdcəsinə vergi borcları var.

Lerik rayonu ərazisində fəaliyyət göstərən “Relax” istirahət mərkəzini idarə edən “Relax Lerik” MMC –nin (VÖEN – 6300539991) dövlət büdcəsinə 26 min 464 manat 19 qəpik vergi borcu var. “Relax Lerik” MMC-yə daha əvvəl İqbal Məmmədovun qardaşı Çingiz Məmmədov rəhbərlik edib. 2019-cu ildə “Relax” istirahət mərkəzində Vergi İdarəsinin əməkdaşlarına qarşı fiziki güc tətbiq etdikləri üçün İqbal Məmmədovun oğlu Mirhəmid Nərimanlı və qardaşı oğlu Orxan Nərimanlı həbs olunublar.

Bundan başqa Lerik rayonunun Piran kəndində fəaliyyət göstərən “Lerik Broyler” MMC-nin (VÖEN – 6300158201) dövlət büdcəsinə 84 min 553 manat 20 qəpik vergi borcu var. 2010-cu ildə dövlət qeydiyyatına alınan “Lerik Broyler” MMC-yə hazırda millət vəkilinin qardaşı oğlu Orxan Nərimanlı rəhbərlik edir.