Sabirabad rayonu Azadkənd kəndinin sakini, 23 yaşlı Orxan Quliyev hərbi xidməti bitirməyinə 6 ay qalmış başlayan İkinci Qarabağ müharibəsində Ağdamda gedən döyüşlər zamanı yaralanmışdı. O, müharibənin ortalarına doğru sağ ayağından qəlpə yarası alaraq, Bakıdakı hospitalda əməliyyata göndərilmiş, 14 gündən sonra isə ayağı sağalmamış təkrar döyüşə qayıtmışdı. Daha sonra ayağındakı şiş toxumasının böyüməsi səbəbindən keçən il aprelin 18-də Milli Onkologiya Mərkəzində əməliyyat olunub və ayağı amputasiya edilib. Yatağa məhkum olmuş müharibə veteranı Orxan Quliyevin valideynlərinin sözlərinə görə, onlar dövlət qurumlarına müraciət etsə də, yardım edən olmayıb. Hətta təcili tibbi yardım və yerli xəstəxanalardakı tibb işçiləri Orxanın yarasına qulluq etməkdən imtina ediblər.

“Hospitala gələndə ayağında qəlpə qalmışdı. Müalicəsi də yanlış getdi. Sağalmamış yenidən xidmətə apardılar. Gələndən sonra həmin şiş ağciyərində problem yaratdı. Nə sağlığında, nə də dəfnində heç kim baş çəkmədi. Bircə ölümünün üçüncü günündə İcra Hakimiyyətinin nümayəndələri baş çəkdi. Bütün aidiyyəti qurumlara müraciət etdik, heç kim baxmadı. Nazirliyə və digər qurumlara da sənədləri vermişik. Dedilər, nə vaxt zəng etsək, gələrsiniz.

Hələ də gözləyirik, xəbər yoxdur”. Qazi Orxan Quliyevin atası Cümşüd Quliyev Pressklub.az saytının əməkdaşı ilə söhbətində dövlət qurumlarının onlara laqeyd yanaşmasından gileylənib. Hələ Orxan Quliyevin sağlığında Dövlət Tibbi-Sosial Ekspertiza və Reabilitasiya Agentliyi mətbuata bildirmişdi ki, əlilliyin qiymətləndirilməsini aidiyyəti qurumlar vətəndaşla bağlı müvafiq sənədlər təqdim edildiyi halda həyata keçirir.

O. Quliyevin də əlilliyin qiymətləndirilməsi ilə bağlı qeydiyyatda olduğu tibb müəssisəsinə lazımi sənədləri təqdim etməsinə baxmayaraq, “Forma-88” sənədi əlillik altsisteminə daxil edilməyib. Yeri gəlmişkən, qurumdan bildirilmişdi ki, əlilliyi müəyyən olunmuş şəxslər reabilitasiya xidmətləri və ehtiyac duyduqları reabilitasiya vasitələri ilə təmin olunurlar. Tibb müəssisəsinin həkimləri tərəfindən şəxslə bağlı yeni göndəriş rəsmiləşdirildikdən sonra onun əlilliyi

qanunvericiliyə uyğun olaraq qiymətləndiriləcək. Qazimizin valideyni isə deyir ki, məsələ hələ də həllini tapmayıb. Pressklub.az məsələni aydınlaşdırmaq üçün Dövlət Tibbi-Sosial Ekspertiza və Reabilitasiya Agentliyinin İctimaiyyətlə əlaqələr və daxili kommunikasiya şöbəsinin müdiri Tural Qurbanovla əlaqə saxladı. Qurbanov açıqlamasında bildirdi ki, qazimizə müddətsiz əlillik təyinatı verilib. “Qazi agentliyə ilk dəfə müraciət etdikdə Təbib “Forma-88” sənədini sistemə daxil etməmişdi. Ona görə də biz onun əlilliyi ilə bağlı qiymətləndirmə edə bilmirdik. Müraciətdən bir neçə gün sonra sənəd sistemə daxil edilib və Dövlət Tibbi-Sosial Ekspertiza və Reabilitasiya Agentliyinin həkim-ekspertlərinin qərarı əsasında qazimizə hərbi xidmət dövrü ilə əlaqədar orqanizm funksiyalarının 90% pozulmasına görə müddətsiz əlillik təyinatıaparılıb. Qazimizə Allahdan rəhmət diləyirik!”. Mərhum Orxan Cümşüd oğlu Quliyev dekabr ayının 17-də dünyaya gözlərini yumdu. Səssizsədasız, heç bir dəstək almadan yaşadığı ağrılı günlərinə elə səssizcə vida etdi… Vətən uğrunda sağlamlığını, canını qurban verən igidimiz nur içində yat!

 (Terefinfo)