Azərbaycan Dövlət Televiziyası (AzTV) yeni loqosunu təqdim edib. AzTV yeni loqonu təqdim edəndən sonra bu, sosial şəbəkələrdə müzakirələrə səbəb olub. AzTV rəhbərliyinin bu cür addım atmasını təqdir edənlərlə yanaşı, onu tənqid edənlər, yeni loqonu bəyənməyənlər də az deyil.

Məsələn, AzTV-nin keçmiş əməkdaşı Tahir Paşa özünün sosial şəbəkə hesabında yeni loqo haqqında bunları qeyd edib:
“Televiziya dövlətin ideoloji vasitəsidir! Dövlət televiziyamız AzTV-nin loqosunda bu ideologiyamızın simvollarını dünyanın qəbul etdiyi rənglərlə bu cür göstərilmişdi: - türkçülük, mübarizə, islam! Yeni sədr bunları ləğv edib, yerinə bir üçbucaq qoyub - hər bucağa özünəməxsus məna verib - TV tarixi, TV inkişafı, TV-yə dövlətdən dəstək. Deməli, sədr Rövşən Məmmədovun düşündüyü fikirlər dövlətin ideologiyasından üstündür?
Simvol bir şəxsiin kəşfi, təxayülü, uydurması olmur. Dövlətin hesabına mövcud olan AzTV Dövlət ideologiyasını uca tutmalı və onun simvollarını təbliğ etməlidir!”.

Dövlət Televiziyasının yeni loqosu ilə bağlı Modern.az-a danışan teletənqidçi Zeynal Məmmədli xatırladıb ki, ilk şərt loqonun televiziyanı tanıtmasıdır:

“Mən AzTV-nin yeni loqosunu görməmişəm, sadəcə ideal loqoya qoyulan tələbləri sadalaya bilərəm. Loqo ekranda əslində gözə batmamalıdır, sızdırılmalıdır ki, ekranda çox az yer tutsun. Məsələn, AzTV-nin əvvəlki loqosu həddindən artıq iri idi. Ümumiyyətlə, necə tendensiyadırsa, bizdə loqolar həddindən artıq iri olur. Üstəlik, loqonun sadəliyi və mücərrədliyi bir arada olmalıdır, yəni özü sadə görünsə də, ifadə etdiyi məna kifayət qədər mücərrəd, anlamlı olmalıdır. Yeni loqodan kim hansı məna çıxaracaq – bu ayrı məqamdır. Mənə qalsa, AzTV-nin elə ilkin loqosunun saxlanması daha düzgün olardı. Çünki heç bir şirkət keçmişini danmamalıdır. Yeni loqonu hazırlayarkən də, dürüstlüyü ön plana çəkmək önəmlidir ki, tamaşaçı inansın. Baxın, “New York Times” qəzetinin indiki tərzinə nəzər yetirdikdə, loqosu, şirftləri, yazı tərzi nə kreativ, nə də yaradıcıdır. Amma o tarixi olduğu üçün, bunu saxlayıblar. Bu baxımdan mən də tarixiliyin tərəfdarıyam”.

Bakı Dövlət Universitetinin Jurnalistika fakültəsinin dekanı Vüqar Zifəroğlu isə düşünür ki, dəyərləri yaşatmaq, nəsildən nəsilə ötürmək, o irsi sahiblənmək loqo ilə ölçülmür:

“Ümumiyyətlə, bu logo dəyişikliyi ətrafında belə bir müzakirənin aparılmasının özü mənə olduqca təəccüblü görünür. Hər zaman müasirlikdən, dünya jurnalistikasında Qərb təcrübəsinin bizdə də tətbiqindən danışırıq, örnəklər gətiririk. Qərbin elə bir aparıcı yayım şirkəti yoxdur ki, onun loqosu zamanla dəyişməsin. Və bu da təbiidir. Bilirsiniz ki, dünya praktikasında re-brendinq anlayışı var. Bu - hər hansı müəssisənin zamanın çağırışlarına uyğun olaraq simasında və məzmununda dəyişikliklər edilməsinə deyilir. Loqo dəyişikliyi - keçmiş irsi unutmaq, Azərbaycan Televiziyasının zəngin və şərəfli tarixi keçmişinə üz çevirmək deyil. Əksinə, bu irsi yaşatmaq, müasir dövrün tələblərinə və gözləntilərinə uyğun təqdim etmək və sabaha doğru aparmaqdır ki, zatən yeni loqoda bu ifadə edilir. Mən AzTv-nin yeni loqosunu bəyəndiyimi deyə bilərəm”.

Telejurnalist, professor Qulu Məhərrəmli isə bu müzakirələrdə neytral mövqedədir. O, AzTV-nin loqosunun dəyişdirilməsini normal qarşılayır:


“Bu sadə bir prosedurdur. Yeni rəhbər gəlib və o, elə deyil, belə görmək istəyib, dəyişiliklik edib. Bu normaldır. Loqodan başlamaqla, arzu olunardı ki, edilən dəyişikliklər kompleks hal alsın. Televiziyanın dizaynı, görüntü ilə bağlı digər məsələlər, texniki məqamlar da yenilənsin. Xüsusilə, xəbərlərin indiki tərtibatının, studiyanın dəyişdirilməsini arzulayardım. Əgər dəyişiklik dalğası başlayıbsa, fikrimcə, AzTV-dəki verilişlərin bəziləri bağlanacaq. Loqonu da normal qəbul edirəm. Nə mənfi, nə də qeyri-adi müsbət addım sayıram”.

AzTV-nin əvvəlki loqosu
Qeyd edək ki, “Azərbaycan Televiziya və Radio Verilişləri” Qapalı Səhmdar Cəmiyyətinin sədri Rövşən Məmmədov AzTV-nin yeni loqosunun izahını verib. R.Məmmədov loqoda niyə 3 bucaq təsvir olunduğunu belə şərh edib:

“Özlüyündə sadə, lakin düşünürük kifayət qədər müasir formaya malik yeni loqonun elə bir o qədər də sadə rəmzi mənası var. Belə ki, 3 bucağın hər bucağı konkret dövrü ifadə edir: keçmiş, bu gün və gələcək.

1-ci bucaq-Azərbaycan Televiziyası 63 illik zəngin tarixi keçmişə və özünəməxsus ənənələrə, inkişaf yoluna malikdir. Zaman dəyişsə, yeni zövqlər və tələblər meydana gəlsə də biz tariximizə bağlıyıq və atdığımız hər bir addım məhz həmin ənənələrə, kökə söykənməlidir.

2-ci bucaq- Auditoriya uğrunda sözün əsil mənasında gərgin mübarizənin getdiyi müasir günümüzdə biz zamanla ayaqlaşmalı və tamaşaçı zövqünə cavab verməliyik. Deməli, tarixiliklə yanaşı müasir tələblər də əsas götürülməli, müasirliklə ayaqlaşmalı, hətta bəzi prinsiplər dəyişməlidir.

3-cü bucaq- Biz gələcəyə baxırıq və əsas hədəfimiz doğma kanalımızı yalnız Azərbaycanda deyil, MDB məkanında, regionda və bir qədər də qabağa gedərək dünyada aparıcı informasiya vasitələrindən birinə çevirməkdir. Bu yolda dəstəyimiz - müstəqil Azərbaycan dövləti və yorulmadan çalışan böyük yaradıcı kollektivimizdir. Beləliklə, yeni loqo özlüyündə keçmiş dəyərlərə hörmət, müasirlik və yeniliklə ayaqlaşma və gələcək hədəflərə doğru inamla addımlamaq mənalarını təcəssüm etdirir. Vətənimiz, millətimiz üçün xeyirli olsun".



Paylaş: