Bakıda gəlin keçmiş əri və qayınanasını məhkəməyə verərək onlardan 40 min manat və nişan üzüyünü tələb edib.

“Qafqazinfo”nun verdiyi xəbərə görə, gəlin Aysel Kərimova (şərti) Sabunçu rayon məhkəməsinə müraciət edərək əri Elvin Əliyev (şərti) və qayınanası Aytən Əliyevaya (şərti) qarşı iddia qaldırıb.

A.Kərimova iddia ərizəsində qeyd edib ki, ona vurduqları mənəvi zərərin əvəzi olaraq əri və qayınanasının hər birinin 20 min manat kompensasiya ödəməsini, ondan üzr istəmələrini, onların əməlləri nəticəsində dərmanlara xərclədiyi 50 manatın və dövlət rüsumu kimi ödədiyi 30 manatın, hədiyyə olaraq bağışlanmış dəyəri 4100 manat olan 48 qramlıq, 4 karat 800 sot brilyant qaşlı qızıl dəstin (2 ədəd sırğa, 1 ədəd üzük, 1 ədəd boyunbağı və 1 ədəd qolbaq), bu dəstin naturada verilməsi mümkün olmadıqda isə onun əvəzi olaraq 4100 manat pulun ona ödənilməsini xahiş edib.

Gəlin A.Kərimova bildirib ki, Elvin Əliyev ilə 2013-cü il iyulun 13-də rəsmi nikaha daxil olublar: “Toydan sonra onların Bakıxanov qəsəbəsində yerləşən mənzilində birlikdə yaşayırdıq. Gəlin köçdükdən təxminən bir həftə sonra onlar məni təhqir etməyə, ərim isə döyməyə başladı. Qayınanam məni çoxlu təhqiramiz küçə söyüşləri ilə söyərək şərəf və ləyaqətimi alçaldırdı, daim məni əsəb və gərginlik içində saxlayırdı. Gəlin köçdüyüm evdə demək olar ki, hər gün eşitdiyim təhqiramiz sözlərdən güclü stress və əsəb gərginliyi keçirdiyimə görə müalicə üçün həkimə müraciət etdim və hazırda da müalicə alıram. Həmin il sentyabrın 9-da ərimdən boşandım. Onlar məni, xoşbəxt ailə qurmaq arzusu ilə yaşayan 23 yaşlı qızı ailə qurmaq adı altında aldadaraq gəlin köçürdüb 2 aydan sonra isə ailəmi dağıdaraq məni bədbəxt etdilər. Bu olanlardan sonra Bakı şəhərində ailə qurmağım qeyri-mümkündür”.

A.Kərimova əlavə edib ki, qayınanası onun nişan üzüyünü də qaytarmır: “Onlar mənə nişanda və toyda mənə dəyəri 4100 manat olan 48 qramlıq, 4 karat 800 sot brilyant qaşlı qızıl dəst (2 ədəd sırğa, 1 üzük, 1 ədəd boyunbağı və 1 ədəd qolbaq) bağışlayıblar. Lakin məni evdən çıxardıqdan sonra həmin qızıllar gəlin köçdüyüm evdə qaldı. İndi qızılların mənə qaytarılmasını tələb edirəm”.

Sabunçu Rayon Məhkəməsi A.Kərimovanın iddiasını təmin etməyib.

İşin materiallarında olan arayış və ekspert rəyləri ilə müəyyən edilib ki, A.Kərimova depressiya və nevroz xəstəliyinə tutularaq mənəvi xəsarət alıb. Məhkəməyə təqdim edilmiş audioyazıdan qayınana Aytən Əliyevanın təhqiramiz ifadələr işlətməsi açıq-aşkar görünür.

A.Kərimova məhkəmədə ifadəsində bildirib ki, gəlin gedənə qədər qayınanasının oğlunu başqa qızla evləndirmək fikri olduğunu bilməyib: “Sonradan qayınanam dedi ki, əvvəlcədən fikri oğluna öz sevdiyi qızı alıb, sonra onu boşatdırıb özünün seçdiyi qızla evləndirmək olub. Sentyabrda evdə söz-söhbət oldu və atamı çağırdılar. Amma atam məni aparmadı. Bundan sonra baldızım məni qapıdan çölə atdı, qapını da üzümə bağladı, ona görə də atamla getməyə məcbur oldum. Evdən xalatla çıxmışdım, getmək fikrim olmadığı üçün özümlə heç nə aparmadım. Qaynanamın otağına telefon qoyaraq onun səsini yazmışdım, amma hazırda o telefonu satmışam”.

A.Əliyevanın nümayəndəsi məhkəmədə iştirak edərək qızılları gəlin A.Kərimovanın özünün apardığını bildirib.

Məhkəmə qərar verib ki, qayınana Aytən Əliyeva keçmiş gəlininə vurduğu mənəvi zərərin əvəzi olaraq ona 2500 manat kompensasiya ödəsin, ekspertiza xərclərinə görə isə ondan 350 manat tutulsun.


Paylaş: