Bakı şəhərində yanğın hadisəsi baş verib.
“Yeni Sabah” xəbər verir ki, bu barədə Fövqəladə Hallar Nazirliyi (FHN) məlumat yayıb.

Bildirilib ki, Binəqədi rayonunda beşmərtəbəli yaşayış binasının 3-cü mərtəbəsində ümumi sahəsi 32 m² olan 2 otaqlı mənzilin mətbəxində kombi aparatı yanıb. Yanğın zamanı 2-si azyaşlı olmaqla 4 nəfər bina sakini yanğınsöndürənlər tərəfindən təhlükəsiz əraziyə təxliyə olunub. Mənzil yanğından mühafizə olunub. Yanğın yanğından mühafizə bölmələri tərəfindən söndürülüb.

Qeyd edək ki, yanğın baş verən mənzildə tanınmış idman jurnalisti Amal Abuşov yaşayırmış. Həmkarımız hadisə ilə bağlı bu sözləri deyib:

“Gecənin bir aləmi pişiyin səsinə oyanmışam. Uşaqlar qapının ağzında korobka qoyurlar, pişik orda yatır. Yanğından da ilk o xəbər tutub, tüstüdən qaçmağa yer tapmayıb, başlayıb qışqırmağa. Qapını açdım ki, tüstüdən göz gozü gormür. 3-cü mərtəbəyə kimi düşdüm, blokun pəncərələrini açdım. Sonra geri qayıdıb 112-yə və 103-ə yığdım. Hamı həyəcandan bunu unutmuşdu, mənzildə yaşayanlar isə ümumiyyətlə, özlərini itimişdilər. Sağ olsunlar, düz 5 dəqiqə sonra yanğınsöndürənlər gəldi, bizi xilas elədilər. Dəfələrlə demişəm, bu ölkədə ən yaxşı işləyənlər elə yanğınsöndürənlərdi. Az sonra təcili yardım, ardınca da “Azərişıq” gəldi. Beləcə bir faciəni atlatdıq. Allah hamınızı qorusun. Ehtiyatlı olun. Kombi aparatını mebelə yaxın quraşdırmayın!”


Paylaş: