Lerikdə 15 yaşlı qızla cinsi əlaqədə olan və onu hamilə qoyan 60 yaşlı müəllimin bir il müddətinə həbs cəzası alması qalmaqal yaradıb.

Sosial şəbəkələrdə yaşlı müəllimin əqli cəhətdən zəif olan azyaşlı ilə cinsi əlaqəyə girməsi, ancaq cəmi 1 il azadlıqdan məhrum edilməsi qınanılıb. Hadisəyə yenidən hüquqi qiymətin verilməsi üçün Baş Prokurorluq protest verib.

Müəllim Şəfahət Məmmədovun Cinayət Məcəlləsinin 152.1-ci (on altı yaşına çatmayan şəxslə cinsi əlaqədə olma və ya seksual xarakterli hərəkətlər etmə) maddəsi ilə təqsirləndirilməsinə dair cinayət işi üzrə istintaq tamamlanmaqla ittiham aktı 16 iyun 2020-ci il tarixdə Lerik rayon prokuroru tərəfindən təsdiq edilərək iş baxılması üçün aidiyyəti üzrə Lerik rayon Məhkəməsinə göndərilib.

Qeyd edək ki, hadisə Lerikin Kirəvud kəndində baş verib. 15 yaşlı qızla rus dili müəllimi, 60 yaşlı Məmmədov Şəfahət münasibətdə olub. Şəfahət Məmmədov barəsində Lerik rayon Məhkəməsində hakim Atabəy Kiçikbəyov tərəfindən çıxarılan qərarla o, cəmi 1 il (Cinayət Məcəlləsinin 152.1-ci maddəsi ilə, yəni on altı yaşına çatmayan şəxslə cinsi əlaqədə olma) həbs cəzası kəsilib. Məlum olayla bağlı 60 yaşlı müəllimə cəmi 1 il cəza verilməsinə etirazların genişləndiyi bir vaxtda məlum olub ki, hakimin oğlu, Vəkillər Kollegiyasının üzvü Emin Atabəy oğlu Kiçikbəyov qərarı dəstəkləyib.

Cebhe.info-ya açıqlamasında vəkil Emin Kiçikbəyov olayla bağlı bəzi təfərrüatları açıqlayıb. O deyib ki, əslində 15 yaşlı qızın uşağı 60 yaşlı Şəfahət Məmmədovdan deyil. Azyaşlı ondan əvvəl bir neçə nəfərlə cinsi münasibətdə olub:

“Çox adam məsələnin əsl mahiyyətini bilmir və ağlına gələni danışır. Biri deyir 5 il həbs verilsin, digəri belə...Biz də deyirik ki, 60 yaşlı müəllimin cəzası ağır olmalıdır. Amma ilk növbədə fakt sübuta yetirilməlidir ki, bu da olunmayıb. Azyaşlının həqiqətən də müəllimdən hamilə qalmasını sübuta yetirmək üçün DNT testi götürülməli idi. Bu da olunmayıb. Bir sözlə, istintaq düzgün aparılmayıb.

Məhkəməyə hazırlıq iclasından iş geri qaytarıldı. Ondan sonra da qızın ailəsi şikayətçi qismində çıxış etmədi. Şikayət olunmadığından ittihamçı 2 il istəyib. 152.1-ci maddə 1 ildən 3 ilə qədər azadlıqdan məhrumetmə nəzərdə tutur. İstintaq nəyi təsdiq edirsə, məhkəmə də onu təsdiqləyir. Şəfahət Məmmədov məhkəməyə arayış verərək II qrup əlil və himayəsində yaşlı anasının olduğunu bildirib. Həmçinin arayışında anasının kor və I qrup əlil olduğunu, özünün 60-dan yuxarı yaş olduğuna görə nəzərə alınmasını xahiş edib. Hətta adam üsyan edir ki, haqsız yerə həbs edilib. Özünü təqsirkar hesab etmir. Məhkəmə subutları içərisində qızın Şəfahət Məmmədovdan hamilə qaldığı barədə sübutlar yoxdur. Sadəcə ailə iddia edir. Əgər istintaq təyin etsəydi ki, həqiqətən uşaq Şəfahət Məmmədovdandır, o zaman şəxsə 4 ildən 7 ilə qədər həbs cəzası veriləcəkdi. İstənilən halda qərarı məhkəmə verdiyi üçün hər şey onun başında çartlayır”.

Vəkil qeyd edib ki, 15 yaşlı qızın ailəsi həddindən artıq problemlidir:

“O qız özbaşına deyil, onun da sahibi var. Lazım gəlsəydi, doğmaları qıza sahib çıxardılar, çıxmayıblarsa, demək ki, başqa məqsədləri olub. Hadisə necə olub, onu dərindən bilmirik. Nə bilirsiz, bəlkə uşağı onlar oynadırlar? Bu məsələnin içində hər bir şey var. Elə şeylər var ki, deyiləsi deyil. O ailəyə 5 manat ver, hər şeyə razılaşarlar. Valideyn əqli cəhətdən zəif olan qızına sahib çıxmalı idi. Qız başqa şəxslərlə də cinsi əlaqədə olub.

Təbii ki, müəllimin etdiyi əmələ haqq vermirəm, hətta edam olunmasını istiyərəm. Özüm Vəkillər Kollegiyasının üzvüyəm və belə olaylarda hər zaman uşaqların müdafiəsini təmin etmişəm. Amma bu məsələdə qızın ailəsi bir deyimlə iddia edib ki, azyaşlının hamilə qalmasına həmin müəllim səbəbkardır. Başqa sübut və ya ekspertiza rəyi olmayıb.

Məhkəmə isə özbaşına deyil, sübut və sənədlər əsasında qərar verir. Təsəvvür edin ki, bu məsələdə şikayətçi olmayıb. Bu məsələ şəxsən mənə qaranlıq qalır. İttiham olunan və qarşı tərəf məhkəməyə gəlir, amma ittihamçı şikayət etmir. Niyə? Çox qəribə addım atırlar. Gah şikayət verirlər, gah da geri götürürlər. Onları anlamaq olmur. Şikayət olmadığına görə Lerik rayon Məhkəməsi belə bir qərar çıxarıb”.


Paylaş: