Məlum olduğu kimi tanınmış tarixçi-alim, Bütöv Azərbaycan Ocaqları başqanının ideoloji məsələlər üzrə müavini Dilavər Əzimli 1 aydan çoxdur Fövqəladə Hallar Nazirliyinin Zığ qəsəbəsində yerləşən modul tipli xəstəxanasında koronavirusla mübarizə aparır. Bu ilin yanvarın 4-də xəstəxanaya yatırılan tarixçinin durumu heç də qənaətbəxş deyil.

Tarixçinin yaxın dostu, BAO təmsilçisi, türkoloq-alim Faiq Ələkbərli Dilavər Əzimlinin səhhəti ilə bağlı ciddi narahatlıq keçirdiklərini deyib. F.Ələkbərli vurğulayıb ki, tarixçi adıçəkilən xəstəxanaya sap-sağlam, ayaq üstə gedib.

Onun sözlərinə görə, əslində Dilavər Əzimli koronavirusdan sağalmışdı, sadəcə əlavə müalicə almaq və ciyərlərində hansısa fəsad qalmaması üçün Zığdakı xəstəxanaya yatırılmışdı:

“Xəstəxanada EKMO aparatına qoşublar, amma vəziyyəti yaxşılığa doğru getmir. Bəlkə də, keyfiyyətli iynə-dərmandan istifadə etmədikləri üçün səhhəti düzəlmir. Son məlumata görə, hətta ciyərlərinin 80 faizi süni aparat vasitəsi ilə işlədilir. Əgər müalicəsi, yaxud hər hansı preparatla bağlı nəyəsə ehtiyac varsa, biz BAO olaraq əlimizdən gələni etməyə hazırıq.

Deyirlər ki, sepsis olandan sonra ağır immunitet preparatlarından istifadə olunub və bədənin immuniteti zəifləyib. Artıq orqanizm müalicəyə cavab vermir. Həkimlərdən də fərqli fikirlər gəlir. Açığı, xeyli vaxt keçib, çox narahat oluruq. Bəziləri haqlı olaraq düşünürlər ki, görünür, xəstəyə yetərli diqqət ayrılmır və sistemli müalicəsi təşkil olunmur”.

Vəziyyətlə əlaqədar FHN-nin Zığ qəsəbəsində yerləşən modul tipli xəstəxanası ilə də əlaqə saxladıq. Xəstəxana rəsmisi, operator Aynur Mirzəyeva “Sherg.az”a bildirdi ki, Dilavər Əzimlinin vəziyyətinin qənaətbəxş olmadığını təsdiqləyib:

“Dilavər müəllimin vəziyyəti ağır olaraq dəyərləndirilir. Hazırda ciyərləri 40 faizlə EKMO aparatına qoşuludur. Hələlik aparatdan ayırmaq mümkün deyil, çünki ciyərlərinin 60 faizi işləmir. Səhhətinin düzəlməməsi də məhz ciyərləri ilə bağlıdır. Bilirsiz ki, koronavirus ciyərləri məhv edir.

Buna baxmayaraq, həkimlərimiz, heyətimiz əlindən gələni əsirgəmir, gecə-gündüz bütün xəstələrə yüksək diqqət və qayğı göstərirlər. Xəstəxanamız hər cür imkanlarla təmin olunub.

Ən müasir tibbi avadanlıqlarla təchiz olunub və bütün preparatlar var”.


Paylaş: