Hollandiyada "Bir türk daha azaldı" deyən polislər türklərdən üzr istəyib.

Musavat.com Türkiyə mətbuatına istinadən bildirir ki, Hollandiyanın Rotterdam şəhərinin polis rəisi Fred Vesterbeke açıqlama verərək, sosial şəbəkələrdə 16 yaşlı türk kökənli Hümeyra E.-nin ölümü ilə əlaqədar "Bir türk daha azaldı" deyən polislərin türklərdən və yeniyetmə qızın ailəsindən üzr istədiyini deyib.

"Rijnmond" telekanalında yayınlanan verilişə qonaq olan Vesterbeke sosial şəbəkələrdə "irqçi çıxışlar" edən polislərin layiqincə cəzalandırıldığını vurğulayıb:
"Hümeyranın ailəsindən və Hollandiyada yaşayan bütün türk toplumundan səmimi qəlbdən üzr istəyirəm. Bilirəm ki, bu hadisə türk toplumuna çox pis təsir edib. Buna görə bir daha türk toplumundan üzr istəyirəm".

Hümeyra E.-nin ailəsi isə irqçi ifadələr səsləndirən polis məmurlarının vəzifələrindən kənarlaşdırılmasını tələb edib.

Xatırladaq ki, Rotterdamda kolleclərin birində təhsil alan Hümeyra E. 2018-ci il dekabrın 16-da dərsdən evə qayıdarkən keçmiş sevgilisi tərəfindən öldürülüb.

Hümeyra E. təhdid edildiyi barədə dəfələrlə polisə şikayət etsə də, polis onun şikayətlərinə əhəmiyyət verməyib.

Bir neçə gün öncə, martın 25-də bu hadisə ilə bağlı sosial şəbəkələrdə müzakirələr gedərkən isə Rotterdam polisləri "Bir türk daha azaldı" deyə ifadələr işlətmişdi. Polisin bu davranışı ictimaiyyətdə, xüsusən türk toplumu tərəfindən qəzəblə qarşılanmışdı.



Paylaş: