İsveçdə azərbaycanlının qətli ilə bağlı daha bir fakt ortaya çıxıb.

Məlumata görə, polis ölümündən öncə qətlə yetirilən 43 yaşlı Ramin Mahmudovu danışdıra bilib.

Onun hansı səbəbdən öldürüldüyü dəqiq bilinmir.

Lakin iddia olunur ki, o, naməlum şəxs tərəfindən səhvən öldürülüb.

***

Saat: 14:36

İsveçdə 43 yaşlı azərbaycanlının qətlə yetirilməsi ilə bağlı yeni xəbər var.

Lent.az İsveçdəki mənbələrə istinadən xəbər verir ki, hadisə ilə əlaqədar hüquq-mühafizə orqanları əməliyyat tədbirləri keçiriblər. Nəticədə qətli törətməkdə şübhəli bilinən 20 yaşlı bir nəfər saxlanılıb.

***

Saat: 13:01

Lent.az İsveçdə qətlə yetirilən 43 yaşlı azərbaycanlı ilə bağlı bəzi təfərrüatları əldə edib.

Məlum olub ki, öldürülən 1978-ci il iyulun 2-də anadan olan Mahmudov Ramin Məhəmmədəli oğludur. O, əslən Qubadlı rayonundandır. Onlar məcburi köçkün kimi Bakıda məskunlaşıblar.

12 il bundan əvvəl Ramin ailəsi ilə birlikdə İsveçə köçüb. Bu zaman onun həyat yoldaşı hamilə olub. Amma uşaq doğulandan bir qədər sonra onun xanımı digər övladını da götürərək Bakıya qayıdıb.

Ramin isə İsveçdə qalaraq xidmət sahəsində çalışıb. O, hər ay ailəsinə pul göndərirmiş.

Hadisənin motivi hələlik məlum deyil. Onun İsveçdə dəfn ediləcəyi, yaxud nəşinin Azərbaycana göndəriləcəyi hələ ki dəqiq bilinmir.

***

Saat: 10:30

İsveçin paytaxtı Stokholmda azərbaycanlı öldürülüb.

Lent.az-ın əldə etdiyi xəbərə görə, 43 yaşlı azərbaycanlı odlu silahla qətlə yetirilib.

Qətlə yetirilən şəxs 12 il əvvəl həyat yoldaşı və uşağı ilə İsveçə gedibmiş. Bundan sonra onların bir uşağı doğulub. Bir qədər sonra ailə dağılıb, evin xanımı isə Azərbaycana geri qayıdıb.

Həmin qadının yerli mətbuata verdiyi açıqlamaya görə, əri sakit təbiətli adam olub, heç vaxt əsəbiləşməzmiş. O da Azərbaycana qayıtmaq istəyirmiş.

İstintaq zamanı müəyyən olunub ki, qətlə yetirilən azərbaycanlı ilə bərabər 15 yaşlı yeniyetmə də yaralanıb. Stokholm şəhər polisinin mətbuat xidmətinin rəhbəri Helena Tomas bildirib ki, qatillər Azərbaycan vətəndaşını öldürdükdən sonra velosipedlə aradan çıxıblar.

Hazırda onların axtarışları davam etdirilir.


Paylaş: