Xəzər rayonu Zirə və Türkan qəsəbələrində narkotacirlər saxlanılıblar onlardan ümumilikdə 11 kiloqram heroin, marixuana və metamfetamin aşkar edilib.

DİN Mətbuat xidmətindən  verilən məlumata görə, Zirə qəsəbəsində yaşayan İsrafil Hüseynovun yaşadığı evin həyətindəki istixanaya baxış keçirən zaman ümumi çəkisi 10 kiloqram olan heroin, marixuana və metamfetamin aşkar edilib.

İ.Hüseynov əvvəllər də narkotik vasitələrin satışı ilə məşğul olduğu  üçün məhkum edilib. Həmin şəxs ifadəsində narkotik vasitələri sosial şəbəkələrdə tanış olduğu xarici ölkələrdən birində yaşayan narkotacirlərdən onlayn yolla Zirə və ətraf qəsəbələrdə satmaq məqsədi ilə əldə etdiyini bildirib. Onun həmin narkotacirlə olan əlaqəsi və narkokuryerlik etmək təklifinə razılıq verməsi tam sübuta yetirilib.

Türkan qəsəbəsində saxlanılan Baba Pənahovun üzərinə və evinə baxış keçirilən zaman 1 kiloqramdan artıq heroin aşkar olunub.

Faktlarla bağlı Cinayət Məcəlləsinin müvafiq maddələri ilə cinayət işləri başlanılıb. Narkotiklərin qanunsuz dövriyyəsini təşkil edən hər iki şəxs barəsində məhkəmənin qərarı ilə həbs qətimkan tədbiri seçilib.