Lerik rayonunun Veri kəndindəki orta məktəb binasının damı yağan qar nəticəsində çöküb. regionxeberlericom.az JAMAZ.İNFO-ya istinadla xəbər verir ki, bu barədə məlumatı təhsil eksperti Kamran Əsədov yayıb.

O bildirib ki, həmin məktəb binası 2012-ci ildə inşa edilib. “Bu, rus silahlı qüvvələrinin Ukraynada zenit raketlə vurduğu məktəb binası deyil. Bura Lerik rayon Veri kənd orta məktəbidir. 2012-ci ildə Lerik rayonu Veri kənd tam orta məktəbi üçün tikilən binanın damı 19 mart 2022-ci ildə yağanqarın ağırlığına tab gətirməyərək uçub”.

Kamran Əsədov yazır ki, o həmin tipdə tikilən məktəbin damının layihəsini görüb. “Əgər dam layihəyə olan formada taxtadan quraşdırılıbsa, onun çökməsi mümkün deyil. İndi əlaqədar qurum araşdırma aparsın və 10 il əvvəl tikilən binanın tenderdə qalib gələn şirkətini də tapsın. Bu necə ola bilər ki, köhnə məktəblərin damı uçmur, lakin təzəsi uçur? Ümumiyyətlə, bu məktəblər tikiləndən sonra onu müvafiq qurum təhvil almalıdır. Amma təcrübədə bu yoxdur”.