Bərdə rayonunda xəstəxanaya atılan azyaşlı uşaqların valideyni tapılıb.

regionxeberlericom.az bildirir ki, bunu “Report”a açıqlamasında Səhiyyə Nazirliyinin Mətbuat xidmətinin rəhbəri Pərviz Abubəkirov deyib.

O bildirib ki, iyulun 22-də axşam saatlarında yaşlı kişi və qadın Bərdə Rayon Mərkəzi Xəstəxanasına iki azyaşlı uşaq gətiriblər: "Onlar növbətçi həkimə deyiblər ki, guya uşaqları tapıblar və yazıqları gəldiyinə görə xəstəxanaya gətiriblər. Həkim də bildirib ki, məsələni rəhbərliyə məruzə etməlidir. Növbətçi həkim baş həkimin yanından qayıdanda görüb ki, həmin şəxslər uşaqları xəstəxanada ataraq gediblər".

P.Abubəkirovun sözlərinə görə, məsələ ilə bağlı araşdırma aparılıb və uşaqları xəstəxanaya gətirən yaşlı kişi və qadının onların ana babası və nənəsi olduğu məlum olub: “Ailədə münaqişə olub. Onlar da nəvələrini xəstəxanaya gətirərək növbətçi həkimə onları tapdıqlarını deyiblər".

Nazirlik rəsmisi vurğulayıb ki, dərhal aidiyyəti üzrə məlumat verilib, uşaqlar üçün ayrıca palata ayrılaraq müayinə ediliblər və səhhətlərində hər şey qaydasındadır.

O əlavə edib ki, araşdırmalardan sonra uşaqların atası tapılıb: “Ata deyib ki, uşaqlarıma sahib çıxıram. Hazırda sənədləşmə işləri gedir və çox güman ki, onlar atalarına təhvil veriləcək”.

Qeyd edək ki, hadisə ötən gün axşam saat 21.00 radələrində baş verib. Uşaqlardan biri 9 yaşında, digəri isə altı aylıqdır.


Paylaş: