Azərbaycanda kifayət qədər maraqlı sayıla biləcək məhkəmə çəkişməsi baş tutub. 4 il həbsdə qalan şəxs bəraət alıb və bundan sonra öz hüquqlarını bərpa etmək üçün məhkəmələrə müraciət edib.

Musavat.com xəbər verir ki, 60 yaşlı Natiq Bədəlov dələduzluqda ittiham edilərək 8 il azadlıqdan məhrum edilib. Məhkəmə 4 il sonra onun barəsində bəraət hökmü çıxarıb.

Bundan sonra Natiq Bədəlov işsizliyə görə Əmək və Əhalinin Sosial Müdafiə Nazirliyi yanında Dövlət Məşğulluq Xidmətini məhkəməyə verib.

Natiq Bədəlov bundan başqa qanunsuz həbsdə saxlanmasına görə Maliyyə Nazirliyinə qarşı da iddia qaldırıb. O, 4 il həbsdə qaldığına görə kompensasiya tələb edir.

Belə ki, Bədəlov Əmək və Əhalinin Sosial Müdafiə Nazirliyi yanında Dövlət Məşğulluq Xidmətinin Nərimanov rayon Məşğulluq Mərkəzindən dörd il əvvəl iş istəyib. Amma o işlə təmin olunmayıb.

Bədəlov deyir ki, Məşğulluq Mərkəzi vəzifəsinin öhdəsindən gələ bilmir: "Dörd il ərzində işlə təmin olunmadım. Mənə həm maddi, həm də mənəvi ziyan vurub. Məşğulluq Mərkəzinin üzərinə 25 min manat kompensasiya ödəmək öhdəliyi qoyulmalıdır".

Məşğulluq Mərkəzindən isə bildirilib ki, N.Bədəlov 6 noyabr 2015-ci ildə işaxtaran vətəndaş kimi müvəqqəti qeydiyyata alınandan sonra ona bir neçə müəssisədə vakant iş yerləri təklif olunub. Ancaq özü imtina edib, deyib ki, yaşına uyğun işdə çalışmaq istəyir.

Məhkəmə bu iddianı təmin etməyib. Bildirilib ki, Bədəlov tələb etdiyi 25 min manatı hansı əsasla tələb eydiyini sübut edə bilmir. Buna görə də iddia rədd edilib.

Bədəlovun Maliyyə Nazirliyinə qarşı kompensasiya tələbi isə qismən təmin edilib. O, həbsdə saxlandığı 1735 günün hər birinə görə 165 manat tələb edir.

Bundan əlavə, o, iş yerini itirməsinə görə 150 min, özünə və ailəsinə dəymiş mənəvi ziyanın əvəzi kimi 100 min manat tələb edir. Onun cəmi tələbi 746 min 875 manat olub.

Bədəlov həmçinin tələb edib ki, oğlunun təhsil haqqı ödənilsin və universitetə bərpa edilsin, Naxçıvanda yaşayan anasına, Bakıda ailəsinin yaşadığı ünvandakı qonşularına onun bəraət alması haqda bildiriş göndərilsin.

Məhkəmə iddianı qismən təmin edib. Bədəlova mənəvi ziyana görə 8 min, maddi ziyana görə isə 1900 manat kompensasiya ödəniləcək.


Paylaş: