Tovuzda qaçırılan 15 yaşlı qız ailəsinə təhvil verilib.

Bu barədə Daxili İşlər Nazirliyinin Mətbuat Xidmətinin Gəncə regional qrupunun baş inspektoru Eşqin Qasımov deyib.

O bildirib ki, noyabr ayının 11-də 15 yaşlı qızın qaçırılması barədə Tovuz Rayon Polis Şöbəsinə müraciət daxil olub. Dərhal polis əməkdaşları tərəfindən təxirəsalınmaz tədbirlər həyata keçirib və müəyyən edilib ki, Şəmkir rayon Kür qəsəbə sakini, 2007-ci il təvəllüdlü A.Qasımova (ad soyad şərtidir) Tovuz rayon sakini, 1994-cü il təvəllüdlü E.Mehdiyev ilə görüşüb və könüllü şəkildə qaçıblar.

Polis əməkdaşları onların yerini müəyyən edərək gənc qızı valideynlərinə təhvil veriblər.

Faktla bağlı Tovuz Rayon Polis Şöbəsində araşdırmalar davam etdirilir.