Türkiyəli müğənni Mustafa Sandalın həyat yoldaşı Melis Sandal qirokopter (helikopter tipli nəqliyyat vaistəsi) qəzasında yaralanıb.

“Qafqazinfo” Türkiyə mətbuatına istinadən xəbər verir ki, Muğlanın Ula mahalının Akyaka bölgəsindən turistik məqsədlə havaya qalxan qirokopter Göyova körfəzi üzərində olarkən mühərrikində nasazlıq yaranıb. 47 yaşlı pilot Sinan Yılmazın idarə etdiyi qirokopter sərt enişdən sonra zeytun ağaclarına çırpılaraq dayana bilib.

Hadisə zamanı pilotla sərnişin xəsarət alıblar. Məlum olub ki, yaralanan sərnişin Mustafa Sandalın həyat yoldaşı, 34 yaşlı Melis Sandaldır. O, ilk tibbi yardımdan sonra xəstəxanaya aparılıb. Məlumata görə, hazırda vəziyyəti yaxşıdır.

Qeyd edək ki, Mustafa Sandal və Melis Sandal ötən il İtaliyada ailə qurublar.