Bakının Səbail rayonunda dava zamanı iki nəfər ağır xəsarət alıb.

APA-nın məlumatına görə, hadisə Nizami küçəsində yerləşən meydanda qeydə alınıb.

Belə ki, 2003-cü il təvəllüdlü Qurbanlı Oktay Şahin oğlu və onun iş yoldaşı 2002-ci il təvəllüdlü Cümiyev Turqut Tofiq oğlu dava zamanı bıçaqlanıb. Hadisə onların işlədikləri restorandan çıxıb evə gedərkən baş verib. Hər iki şəxsin ofisiant işlədiyi bildirilir.

Xəsarət alan şəxslər Kliniki Tibbi Mərkəzə yerləşdiriliblər. Fakt üzrə Səbail Rayon Polis İdarəsinin əməkdaşları araşdırma aparır.

Hadisə ilə bağlı Kliniki Tibbi Mərkəzin mətbuat katibi Ruzbeh Məmməd “Qafqazinfo”ya bildirib ki, hər iki şəxsin vəziyyəti orta ağırdır: “Səbail rayonunda baş vermiş hadisə zamanı xəsarət alan hər iki şəxs Kliniki Tibbi Mərkəzə hospitalizasiya edilib. Onların vəziyyəti orta ağır qiymətləndirilir. Hazırda həmin şəxslərin müalicəsi reanimasiya şəraitində davam etdirilir”.