Türkiyənin 2-ci liqasının Bəyaz Qrupunda 23-cü turun "Bursaspor"-"Amedspor" oyunundan əvvəl qalmaqal yaşanıb.

Görüş başlamazdan öncə iki komandanın futbolçuları bir-birləri ilə əlbəyaxa dava ediblər. 

"Amedspor"un futbolçuları stadionun ot örtüyünü yoxlamaq üçün meydana çıxanda "Bursaspor"un tribunalardakı azarkeşlərinin etirazı ilə qarşılaşıblar. "Amedspor"un bəzi futbolçularının azarkeşlərə cavab verməsi ilə gərginlik artıb. Bundan sonra "Bursaspor"un futbolçuları meydana çıxıblar. İki komandanın futbolçuları arasında baş verən əlbəyaxa davaya polis müdaxilə edib. 

Daha sonra isə futbolçular paltardəyişmə otağına yollanıblar. Hətta azarkeşlər davaya müdaxilə edən polislərə də butulkalar atıblar.