Bu gün Azərbaycan Ordusu Ali Baş Komandanın rəhbərliyi ilə sentyabrın 27-dən BMT Təhlükəsizlik Şurasının 4 qətnaməsini icra edərək, torpaqlarımızı işğalçılardan təmizləyir. Bu gün hər kəsi maraqlandıran odur ki, işğaldan azad olunan torpaqlarımız iqtisadiyyatımıza hansı töhfələr verəcək.

Bununla bağlı danışan deputat Vahid Əhmədov bildirib ki, 1 milyon hektara yaxın münbit torpaqlar 30 il idi ki, işğalda saxlanılırdı: “Bu, böyük ərazidir. Vaxtıkən o torpaqlarda taxılçılıq, baramaçılıq, üzümçülük və tütünçülük olub. Yəni kənd təsərrüfatına yaralı torpaqlar olub.

Həm də bu bölgələrdə heyvandarlıq çox inkişaf etmişdi. İşğaldan azad olunduqdan sonra yəqin ki, bu sahələr yenidən inkişaf etdiriləcək. Kənd Təsərrüfatı naziri İnam Kərimov da bildirib ki, bu sahələrin yenidən inkişafı üçün hökumət tərəfindən lazım olan bütün işlər görüləcək.

Bundan əlavə o torpaqlarda civə, mərmər və digər faydalı qazıntılarla zəngin yataqlar mövcuddur. Yəqin ki, o yataqlardan çıxarılan metallar ölkənin ixrac potensialını artıracaq. Qeyd edim ki, həmin torpaqlarda kənd təsərrüfatı məhsullarının emalı üçün 200-dən çox sənaye və tikinti müəssisələr olub. Həmin müəssisələrin vacib və lazım olanları yenidən bərpa olunub, istifadəyə veriləcək”.


Paylaş: