Azərbaycan 2020-ci ildə pandemiya şəraitində çox çətin zamandan keçdi.

Koronavirusun dünyada, eyni zamanda ölkəmizdə geniş yayılması bir çox sahələrə, o cümlədən iqtisadiyyata təsirsiz ötüşmədi.

Azərbaycan ilk pandemiya dalğası və ümumi karantin rejimi ilə qarşılaşdı, sonra neft qiymətləri son 10 ildə ən aşağı səviyyəyə endi. Bundan da sonra ölkəmiz Qarabağdakı Vətən müharibəsində ərazi bütövlüyünü bərpa və nəhayət, həmin il epidemiyanın ikinci dalğası ilə başa çatdı. Bir sözlə, 2020 hər sahədə ilklər ili oldu.

Bura işsizliyin səviyyəsinin yüksəlməsini, əhalinin qazancının azaldığını da əlavə etsək, problemlərin aradan qaldırılması üçün müəyyən zaman tələb olunduğu açıq bəlli olar.

Bəs pandemiya və post-pandemiya dönəmində ən yaxşı yatırım vasitəsi hansıdır? Azərbaycanda insanlar ən çox nəyə yatırım edir?

Cebhe.info-ya açıqlamasında iqtisadçı ekspert Fuad İbrahimov bildirib ki, pandemiya və post-pandemiya dönəmində biznes nöqteyi-nəzərdən bu dövrə və karantin rejminə cavab verə bilən xidmət sahələrinin, onlayn xidmət və kənardan idarə oluna biləcək bizneslərin yaradılması üçün qoyulan yatırımlar öz effektini verir:

“Əhalinin yatırımıyla bağlı məsələyə gəldikdə, müəyyən dövrdə Azərbaycan vətəndaşlarının əksəriyyəti öz yatırımlarını banklara depozit kimi qoymaqla, yəni öz strateji ehtiyatlarını “qara gün” üçün saxlamaqla, yaxud xeyir işə ayırdıqları pulları banklara yerləşdirməklə yatırım etmiş olurdular.

Son zamanlar isə banklarda müəyyən problemlərin yaranması, bir çox bankların müflisləşdiyini elan etməsi, bununla yanaşı depozit hesablarının vətəndaşlara geri qaytarılmaması, eyni zamanda devalvasiya qorxusuyla bağlı nəzərə almaq lazımdır ki, banklarda gəlir baxımından dollarla qoyulan vəsaitlərə depozit faizlərinin çox aşağı olduğuna görə vətəndaşlar bir çox banklardan yatırımlarını geri çəkirlər”.

İqtisadçı ekspert bildirib ki, bu da təhlükəli haldır, çünki vətəndaş bazar münasibətlərində iştirak etmir:

“Beləliklə, əhalinin əksər hissəsi yatırımını nağd şəkildə evdə saxlayır”.


Paylaş: