Beynəlxalq Valyuta Fondunun (BVF) cari ilin avqust ayının 2-də Fonda üzv ölkələr arasında əlavə 456,5 mlrd həcmində Xüsusi Borclanma Hüquqlarının (XBH) yerləşdirilməsi barədə qərar qəbul edib.

Bizim.Media xəbər verir ki, bu barədə Maliyyə Nazirliyi məlumat verib.

Bu addımın atılmasına səbəb kimi isə, pandemiyanın yaratdığı böhran səbəbindən maliyyə durumunun kəskin pisləşməsi nəticəsində valyuta ehtiyatlarında ciddi azalmalar göstərilib.

Digər dünya ölkələrinin olduğu kimi, Azərbaycanın da BVF-dəki 0,082 % və ya 391,7 milyon XBH həcmindəki kvotası son qərarın qəbulu nəticəsində 96 %-ə yaxın artırılaraq 767,1 milyon XBH-na çatdırılıb.

Məsələ ilə bağlı iqtisadçı ekspert Əkrəm Həsənov öz fikirlərini Bizim.Media ilə bölüşüb:

“Pandemiya dövründə BVF ölkələrin borclanma kvotasını artırıb və bütün ölkələrə öz xüsusi valyutasında (Fondun özünün xüsusi valyuta forması mövcuddur) borc verib. Qeyd edək ki, Fond həmin valyuta vəsaitlərini pandemiya dönəmində vəsaiti çatmayan, hətta peyvəndi belə ala bilməyən, yaxud da iqtisadiyyatında problemlər olan ölkələrə yönəldə bilirlər”.

Ekspert BVF-nin Azərbaycan üçün borc kvotasını artırmasının ölkəmizə təsirlərindən də danışıb:

“Azərbaycan kimi ölkənin prinsip etibarilə bu borca ehtiyacı yoxdur. Çünki bizim kifayət qədər valyuta ehtiyatımız var. Yəni Azərbaycan üçün ayrılan 767,1 milyon borc, ölkənin valyuta ehtiyatları ilə müqayisədə o qədər də böyük məbləğ hesab olunmamalıdır. Amma bu borcun Azərbaycan üçün ziyanlı tərəfi də yoxdur. Bunun vasitəsilə biz valyuta ehtiyatlarımızı daha da artıra bilərik. Eyni zamanda beynəlxalq aləmdə dövlətimizin əqdlərində əvəzləşdirmə kimi BVF-nin valyutasından istifadə oluna bilər”.

Lakin bir sıra mütəxəssislərin fikrincə, BFV-nin təklifindən imtina etmək ümumiyyətlə mümkün deyil. Çünki belə olan halda fond tərəfindən müəyyən təzyiq “rıçaq”larından istifadə olunur. BVF-nin əlində sanksiyalar, böhranlar, hətta ölkə daxili stabilliyin pozulmasına qədər variantlar mövcuddur.

Rəsmi açıqlamalara görə 700 milyard dollara yaxın valyuta ehtiyatları olan fondun bu cür təsir gücünə malik olması isə şübhəsizdir.

Bundan əlavə kospiroloji məlumatlara görə, BFV-nin arxasındakı əsas güc olan Rotşildlər və Rokfellerlər kimi böyük ailələr iqtisadi manipulyasiyalarla, habelə ölkələrə borc verərək onları asılı vəziyyətə salmaqla öz güclərini artırmağa xidmət edirlər.

Bunun üçün isə, BVF-nin əsas şərtlərindən biri olan iqtisadiyyat üzərində dövlət nəzarətinin azalması və özəlləşdirmənin artırılmasıdır. Nəticədə isə, xarici şirkətlərin investisiyaları ölkəyə cəlb olunur, dövlət transmilli korporasiyalardan asılı vəziyyətə düşür. Bu səbəbdən də, BVF bir sıra siyasətçilər tərəfindən dəfələrlə sərt şəkildə tənqid olunub.


Paylaş: