Rusiyanın "Qazprom" şirkəti Ukrayna ərazisi ilə Avropaya qazın tranzitini davam etdirir.

"APA-Economics"in Rusiya mətbuatına istinadən verdiyi xəbərə görə, bunu "Qazprom"un rəsmi nümayəndəsi Sergey Kupriyanov deyib.

Onun sözlərinə görə, şirkət Avropadan olan istehlakçıların müraciətlərinə uyğun olaraq, Ukrayna ərazisi ilə müntəzəm rejimdə qaz nəql edir.

Bu gün müraciətlərə əsasən, qeyd olunan istiqamət üzrə nəql üçün nəzərdə tutulan qazın həcmi 78,3 mln. kubmetr təşkil edir, bu da 8 aprel tarixinə olan göstərici (91,3 mln. kubmetr) ilə müqayisədə 14,2% azdır.

Qeyd edək ki, "Qazprom"un 2022-ci il üçün Ukraynaya tranzitlə bağlı müqavilə öhdəlikləri 40 mlrd. kubmetr və ya gündə təxminən 109,5-109,6 mln. kubmetr təşkil edir.