Azərbaycan Mərkəzi Bankı (AMB) ilin sonunadək inflyasiyanın artacağını istisna etmir.

Bunu AMB-nin İdarə Heyətinin sədri Taleh Kazımov bildirib:

“2022-ci ilin sentyabrında Azərbaycanda inflyasiya 15,6%, baza inflyasiyası 14,1%, ərzaq inflyasiyası 21,8%, qeyri-ərzaq inflyasiyası 10,5%, xidmət sektorunda inflyasiya 11,4% təşkil edib. Biz hesab edirik ki, Azərbaycanda inflyasiyanın artması idxalla bağlıdır. Biz ilin sonuna kimi artımın olacağını gözləyirik".

O qeyd edib ki, dünya bazarında ərzaq məhsullarının qiyməti 2021-ci ildən başlayaraq artıb. Amma cari ilin mayından enmə müşahidə olunur.

Belə ki, AMB məlumatına görə, günəbaxan və buğdanın qiymətində xüsusi azalma var.

Taleh Kazımov sözlərinə görə, qiymətləndirmələr göstərir ki, 2022-ci ilin mayından qiymətlər yavaş-yavaş 2021-ci ilə qədər olan səviyyəyə enməyə başlayır. Ona görə biz inflyasiya proqnozlarını daha aşağı görürük.

Qeyd edək ki, bugünlərdə Dövlət Statistika Komitəsi tərəfindən 9 aylıq inflyasiyanın 13,4 faiz olduğu açıqlanmışdı.

Doğurdanmı bu gün ölkədəki inflyasyanın artımı idxalla bağlıdır və proqnozlar azalma vəd edir?

Iqtisadçı-ekseprt Fuad İbrahimov Cebhe.info-ya bildirdi ki, inflyasiyanı sürətləndirən amillər var və burada idxalın xüsusi çəkisi var:

“Nəzərə almaq lazımdır ki, bu gün Azərbaycanda istehlak olunan məhsulların əhəmiyyətli hissəsi idxaldan asılıdır. Eyni zamanda yerli istehsalında müəyyən səviyyəsi idxal amilindən asılıdır.

Məsələn, istehsalın elə səviyyələri var ki, idxal olunur və bu gün idxalda bahalaşma baş verirsə, yerli istehsalın da qiymətinə təsir etmiş olur. Eyni zamanda pandemiya ilə mübarizədə dünya iqtisadiyyatı ölkələri fiskal və monetar siyasətdən istifadə etmişdilər. Birmənalı şəkildə bütün iqtisadçılar proqnoz vermişdilər ki, belə mexanizm tətbiq olunanda mütləq şəkildə bahalaşma və inflyasiya baş verir. Ona görə də 2021-ci il dünya iqtisadiyyatı tarixində “inflyasiya ili” kimi qaldı. Azərbaycanda da “idxal olunmuş inflyasiya” termini meydana gəldi. İdxal amilində mallar bahalaşır, ancaq eyni zamanda idxalı “istehsal” etmiş olduq.

Bunun səbəbi odur ki, yanacağın qiymətinin, bununla yanaşı kommunal xidmətlərin bahalaşması kimi tendensiya oldu. İndiki vəziyyətdə artıq ölkə başçısı ilin rübündə ikirəqəmli inflyasiyanın mövcudluğu haqqında məlumat vermişdi.

Mərkəzi Bankın rəhbəri yeni bir fikir söyləmir, ölkə başçısı bu barədə fikir deyib. Ancaq keçən ilə nisbətən inflyasiya artıq səngiyib. İndi əsas məqamlardan biri bazardan monopoliyanı tam aradan qaldırmaqdır. Nə qədər bazar ona dözür biz də qiymət bahalaşmasını müşahidə edəcəyik. Ancaq ümumilikdə makroiqtisadi vəziyyətdə 2021-ci ilə nisbətdə inflyasiya səngiyib”.