Bu ilin yanvar ayında Azərbaycan xarici ölkələrə ümumi dəyəri 10 milyon 583,4 min dollar olan 7 min 125,6 ton pambıq lifi satıb.

Açıqlanan rəsmi məlumatlara istinadən aparılan hesablama göstərir ki, xaricə satılan pambıq lifinin 1 kiloqramının orta gömrük dəyəri 1,5 dollar (2,5 manat) olub.

Müqayisə üçün bildirək ki, ötən ilin eyni dövründə ixrac edilən pambıq lifinin miqdarı bu ilin yanvar ayındakından 1 248,6 ton az olub. İxrac olunan pambıq lifinin dəyəri isə ötən ilin yanvar ayı ilə müqayisədə bu ilin yanvar ayında 4 milyon 956,4 min dollar az olub.

Eyni zamanda xaricə satılan pambıq lifinin 1 kiloqramının orta gömrük dəyəri də ötən ilin yanvar ayı ilə müqayisədə aşağı düşüb. Belə ki, 2023-cü ilin yanvar ayında xaricə satılan pambıq lifinin 1 kiloqramının orta gömrük dəyəri 1,85 dollar (3,1 manat) olub.

Məlumat üçün bildirək ki, 2017-ci ildə Azərbaycan Prezidenti “Azərbaycan Respublikasında pambıqçılığın inkişafına dair 2017–2022-ci illər üçün Dövlət Proqramı”nın təsdiq edilməsi haqqında Sərəncam imzalayıb. Dövlət Proqramının 6.3-cü bəndində açıq şəkildə qeyd olunurdu ki, Dövlət Proqramının icrası nəticəsində 2022-ci ildə xam pambıq istehsalı 500 min ton təşkil edəcək.

Göründüyü kimi, 2022-ci il artıq başa çatıb. Dövlət Statistika Komitəsinin məlumatına görə, 2022-ci ildə sahələrdən 321,8 min ton pambıq yığılıb. Bu isə o deməkdir ki, yığılan pambıq hədəfin 2/3-nə belə çatmayıb.

Qeyd edək ki, pambıq istehsalı və buna bağlı olaraq da ixracda qeydə alınan azalmaların əsas səbəbi kimi ölkə daxilində pambığın alış qiymətinin aşağı olması göstərilir. Məsələn, 2022-ci ildə 1 kq pambıq xaricə 2,26 dollara satılsa da, fermerlərdən cəmi 0,41 dollara alınıb.